圖拉真大橋(Trajan’s Bridge)
通往征服之途的超級工程

公元101年,從奧古斯都到圖拉真,風雨飄搖既公元1世紀落幕,羅馬帝國迎來2世紀既曙光。時值圖拉真上任既第3年,佢開始左一場斷續5年既戰爭。目的:征服多瑙河流域對羅馬威脅最大既達契亞王國(Dacian Kingdom),將之納入帝國統治,以及獲得達契亞控制既金礦銀礦。

達契亞地區既地理位置

達契亞金銀礦既位置

阿波羅多羅斯

公元101-102年既第一場戰爭並無取得決定性既戰果,因為咁,圖拉真召來一位來自中東地區既首席御用建築師。呢個人既名字將會貫穿今季,響呢度會先同大家見個面咁。佢叫做大馬士革的阿波羅多羅斯(Apollodorus of Damascus)。顧名思義,佢出生於今日敘利亞既大馬士革(Damascus),希臘血統,但生卒年份不詳,普遍估計佢係公元1世紀中葉出生,卒於哈德良年間。至於佢點樣識到將來既皇帝圖拉真,同樣我地對呢段歷史亦都唔係好清楚。但我地知道圖拉真既爸爸曾經響敘利亞做過總督,或者係果個時候識得都唔出奇。後來可能阿波羅多羅斯響軍中受圖拉真賞識,成為御用建築師。同今日打緊血腥內戰,烽火漫天蔽日月既敘利亞相反,古時候既敘利亞(Syria)係以經商富裕聞名天下,亦都係地中海世界有名既學者之鄉。阿波羅多羅斯早年相信受過良好既建築學教育同訓練,掌握力學、幾何、數學等建築學原理,為將來既仕途鋪平道路。


大馬士革的阿波羅多羅斯(Apollodorus of Damascus,Ἀπολλόδωρος)大理石半胸像,現藏於慕尼黑

大馬士革的阿波羅多羅斯,建築物上既記念銘文

多瑙河大橋
古代史學者普遍認為,圖拉真大橋係阿波羅多羅斯呢位御用建築師初試啼聲之作。公元103年,為確保橫跨多瑙河(Danube)既補給線穩固,圖拉真決定興建一座橫跨多瑙河既大橋,並將呢個重要既使命交託到佢所信任既建築師阿波羅多羅斯手上。相信各位如果有從頭追睇開呢個系列既讀者,應該仲會記得凱撒用十日起果一條橫跨萊茵河既大橋(Caesar’s Rhine Bridge)。如果唔記得既話,隨時都可以返去第一季重溫。但圖拉真呢條圖拉真大橋唔止長度遠遠超過凱撒萊茵河大橋,而且仲要係永久而非臨時結構。加上多瑙河水流非常湍急,施工困難,呢d都造成額外既技術挑戰。


圖拉真大橋復完模型

有見及此,阿波羅多羅斯(Apollodorus)決定使用磚石混凝土建造整座大橋總共20個基座。圖拉真大橋一口氣打破多個古典時代建築記錄,首先係長度。此橋總長達到驚人既1,135米,亦都係古典時代第一座永久結構而非浮橋突破1公里既長度。當中大約800米距離橫跨河面。大橋橋面闊15米,足夠容納4條現代行車線,距離河面高度達19米,相當於5-6層樓高。橋身採用21個坦弧(segmental arch),單拱38米,扁平率0.28,高寬比0.14,係羅馬時代同以至古典時代整個世界最低既扁平率(建於7世紀既隋代既趙州橋為1個坦弧,單拱37.5米,高寬比0.19,總長50.82米,係羅馬以外扁平率既世界記錄,亦係非混凝土類石拱橋既記錄)。憑藉高超既建橋工藝,羅馬帝國境內所有大河,除幼發拉底河(Euphrates)外都有大橋橫跨。



圖拉真大橋復完圖



圖拉真大橋部分殘存至今既橋墩,20個橋墩當中,16個可被辨認,2個響20世紀初時為疏通航道而被破壞,2個失蹤(可能被洪水沖走)

2012年既新聞,塞爾維亞(Serbia)政府考慮利用激光投射原址重現圖拉真大橋

圖拉真大橋既工程持續兩年,於公元105年竣工。承載全副武裝既羅馬軍團、沉重既投石機同弩砲、以及補給馬車源源不絕將物資同兵員輸往前線。公元106年,圖拉真既軍隊攻陷達契亞首都Sarmizegetusa Regia(面積約30萬平方米,人口約20,000-25,000),達契亞國王Decebalus自殺,達契亞正式納入羅馬行省。圖拉真響達契亞總共發現左165.5噸既黃金同331噸白銀既寶藏,呢d寶藏將支持圖拉真後期極大規模既建築計劃。至於位於達契亞既金銀礦,歷史學家估計一年內為羅馬經濟體系注入相當於7億第納爾銀幣以上(約30億Sestertii銅幣),呢個數字仲未將從達契亞俘虜既奴隸銷售收入計算在內。有趣既係,圖拉真對達契亞征服既傳奇一直持續到今日。今日既羅馬尼亞人,就係當年被圖拉真征服既達契亞人部分既後裔。佢地文化上最後被羅馬人完全同化,今日「羅馬尼亞(Romania)」既國號,「羅馬尼亞人(Romanians)」既種族自稱,出處正正係從拉丁語既羅馬公民(Romanus)字根而非巧合。2004年就任,今日既羅馬尼亞總統,佢個名就正正叫做圖拉真(Traian Băsescu)。被征服既民族以征服者既後人自居,有時候歷史既野,確實令人覺得既矛盾又吊詭。


古達契亞王國(Dacian Kingdom)首都Sarmizegetusa Regia地圖

Sarmizegetusa Regia遺址

古達契亞王國首都Sarmizegetusa Regia部分石砌城牆,曾經阻擋住羅馬人既攻勢


Sarmizegetusa之戰攻城浮雕(取自圖拉真記功柱)

羅馬尼亞現任總統「圖拉真」(任期2004-)