好多時候,醫院為免病人擅自離開,都會安排每位住院病人戴上手帶,手帶上面有病人名字以及bar code等資訊。某啲醫院仲會實行顏色制度,例如白色手帶係普通病人,過咗身嘅病人遺體就會戴上紅色手帶。

某晚,一位外科醫生啱啱做完手術,搭電梯落返地下大堂。佢入電梯時見到個女人,就同佢傾吓閒偈。落到其中一層,電梯門打開,外面有個女人正準備入嚟,但醫生好驚咁猛撳閂門掣,終於成功阻止出面個女人走入電梯。

「你做咩唔畀佢入嚟啊?」電梯裏面嘅女人覺得好奇怪,用一種責怪嘅語氣質問醫生。

「我認得個女人!我啱啱先同佢做完手術,但係手術失敗,佢死咗㗎喇!見唔見到佢戴住條紅色手帶……」醫生解釋時仲係猶有餘悸。

「哦,係咪呢條呀?」女人聽完之後,露出陰森嘅笑容,然後向住醫生舉高自己戴住紅色手帶嘅左手。