某個寒冷嘅冬夜,女仔自己一個人坐喺客廳睇電視。電視機後面係落地玻璃窗,窗嘅百葉簾未閂。

突然間,女仔見到窗外面企咗個男人,眼都唔眨咁望住自己!女仔嚇到尖叫,即刻伸手拎起隔離部電話,然後用梳化上面嘅毛毯冚住自己,因為佢實在太驚。而且咁樣做,出面嘅男人都唔會睇到佢打電話報警。由於女仔實在太恐慌,佢一直毛毯冚住自己個頭,直到警察嚟到先出去開門。

當時該區落緊大雪,警察嘗試搵吓有冇腳印,可以追蹤到個男人,但喺女仔描述嘅位置,警察搵唔到任何腳印。

警察決定返返入屋,呢個時候,佢哋先留意到有一排濕淋淋嘅腳印,由客廳大門一直去到梳化。警察諗咗一陣,好快就知道發生咩事。有警員深呼吸一口氣之後,同個女仔講:
「小姐,你今晚真係好好彩。你見到嘅男人唔係企喺窗外面,而係一直企喺呢張梳化背後。窗外面嘅,只係男人嘅倒影。」