自己蔬菜自己種,近年係外國愈黎愈流行。

部份人係希望提升自給自足率,以增加各種天災人禍之時既生存機會;有部份人係擔心蔬菜既農藥同污染問題;亦有人係為左長遠慳錢。係其他大城巿,例如紐約或波士頓,甚至已經發展出改裝貨櫃為室內農場,提供另一收入來源俾工作時間較為彈性既自由業者。(註:有興趣朋友可以係youtube 搵關於 “Farms in shipping containers” 既報導。)

正統既室內農業,發靭於太空科技,原意提供蔬菜俾太空站甚至外星基地既駐員,故此不惜工本。截至2010年,學界仍然係認為室內農業既成本係普通農業既一百倍,主要為室內燈光既電源。但係近幾年亦有大學和商業機構開始研究城巿內耕作,發現幾個小技巧已經可以將成本大幅降低,令室內農業係大城巿(包括香港),逐漸變得可能。

當然,例如麻省理工既City Farm項目,重點係技術突破,仍然將系統設計得好複雜。但係以半專業心態,其實簡單至一個膠樽,亦能係窗台開展自己既農場。如果採用Kratky式水耕系統,耕作過程甚至唔需要加水,只需要每兩個星期收割既時候,重設水量。如果以窗台種植五棵唐生菜,每星期輪流收割,可以每個星期提供一個家庭一餐既蔬菜量。

有關例子,可以參考 。該頻道 有唔少有關短片,值得參考。

以下係我既研究筆記,希望能夠達到拋磚引玉之效。

1) 品種

室內農業最適合既農作物,係大葉型既蔬菜。依類蔬菜成長期較短,而且往往係開花之前收割,直接食用綠葉。冇開花期,可以減少蟲害;直接食用綠葉,則投入既光源同水源都變成食材,減低成本。
無論係專業運作既改裝貨櫃、大學既研究計劃、定係私人業餘耕作,都以唐生菜為第一個目標。唐生菜之後,亦有椰菜同埋白菜。但係唐生菜既特點係粗生,更適合普通人;而且唐生菜摘葉之後可以重生,同一棵唐生菜,打理得宜,可以幾個月之間源源不絕咁提供蔬菜,減少重新插種既次數。
菜種花園街或者其他地方都有賣。

2)泥耕vs 水耕vs 汽耕

細個種植,都會以泥耕為主。但係泥耕需要打理泥土,亦要管理泥土裏面既微生物,未必適合每個水。而且泥耕實際上係慢過水耕,所需要既土地亦較多,所以大部份室內農業,都以水耕為主。
水耕(hydroponics)主要有兩個技術難關。第一,清水養唔出植物,一定要加入水肥。而家花園街等地方都有賣水肥,只要適量使用,問題己經解決。另外一個問題,係止水惹蚊,而且水中氧氣濃度降低,亦會影響生長速度。傳統上,水耕會用養魚水泵,保持流動,解決依個問題。上面提到既Kratky式水耕,則唔用水泵,靠密封器防止蚊蟲,亦係可行之法。
有部份空間較大的地方,就可能設立系統,係水耕既同時養淡水魚。養魚產生既廢水,就成為水耕既營養水;而水耕既農作物,則吸走水中養份,將乾淨水再循環到淡水魚缸。依類做法,可以達致自給自足,不假外求。但係植物同魚既比例,要慢慢調較,以達致平衡。(依類系統,英文稱之為Aquaponics,有興趣既讀者可以自行係youtube搵片)
汽耕(Aeroponics)將水耕概念再提升一步,以混有營養水既水打成水汽,噴向植物根部。具體而言,一般會改裝類似「劉江華」式垃圾桶既大桶,係垂直果面鑽三四十個三寸直徑既洞,植物係膠杯發芽之後,葉向外,根向內咁插入洞裏面。垃圾桶裏面再裝水汽機,定時噴汽,滋養植物。依類系統,一般要放係花園,故此係香港,未必係最好既選擇。

3) 陽光 vs燈光

室內農業,傳統上最大既成本係燈光既電費。所以一開始,使用陽光係最低成本既做法。上面提到最簡單既Kratky式水耕,就適宜放係窗台,用陽光種植。尤其係一開始嘗試,先以陽光種出第一次收成,之後再改善系統,增加收成,成功既機會最大。

用燈光耕種,最大既優點係可以放幾層,一個家用雪櫃咁大既架,可以放三至四層農作物,可以基本滿足一個家庭一半既蔬菜需要。日本311地震之後,就將工廈改裝,搖身一變成為十幾層農作物既室內農場,號稱可以每日出產上萬棵唐生菜。

燈光耕作,由幾十年前既陽光燈開始,已經演化左幾代。陽光燈係鎢絲燈,極之浪費能源,故此曾幾何時,燈光耕作既成本係普通室外耕作既一百倍。LED燈流行,電費己經大幅降低。後來科學家更進一步,發現植物光合作用主要係靠紅藍二色既光,就變將LED農業燈簡化成紅藍二色。而家工業級既室內農場,人眼楺合紅藍二色,就會見到粉紫色既燈光。最近科學家又發現,植物吸收光子有一開一關既規律,所以又會以電腦控制燈光,每一秒閃動幾百次,進一步節省電力。故此,燈光耕作既成本,已經降低左好幾十倍。係某類情況,例如由郊外運入大城巿既運輸成本,以及高級餐廳或超巿對食材既要求,室內耕作可以係有商業競爭力既選擇。

自己蔬菜自己種

有興趣自己開始耕種既朋友,可以考慮以下策略。

1) 先用Kratky 式水耕,用膠水樽(1公升裝烏龍茶最適合)係窗台種幾棵唐生菜。詳細步驟參考上面提過既Khang Starr頻道。

2)成功之後,一係直接複製同樣系統,考慮種白菜同椰菜,以增加蔬菜種類。

3)屋企有空間,考慮建立水流式水耕系統,改用LED燈系統

4)如果有興趣做商業用途,則可以考慮繼續研究依類系統,成立貨櫃式農場。