歷史背景(下)
盛世驕雄:涅爾瓦(Nerva)和圖拉真(Trajan)的故事

上part講到元老院推舉資深元老涅爾瓦(Nerva,在位公元97-98年)登上羅馬帝國皇位既時候,呢位老人家其實已經66歲,健康情況唔理想,而且佢並無子嗣。涅爾瓦執政期間只有僅僅1年零4個月,所以其實響公共建築既角度,佢做唔到d咩出黎,所以以建築史為主要焦點既《羅馬是怎樣建成的》會跳過涅爾瓦,直入佢既繼任者圖拉真(Trajan,在位公元98-117年)。但從羅馬帝國政治變化黎講,涅爾瓦短暫既帝位係開創在一個全新既時代,對於之後一個世紀帝都羅馬內既政治形勢舉足輕重。

涅爾瓦(Nerva)大理石頭像,於德國科隆

涅爾瓦的政治及經濟政策
涅爾瓦(Nerva)登位之後,佢施行開明既政策,中止一切叛國罪既審訊、釋放政治異見者、將被流放既貴族、元老召回。涅爾瓦曾經起誓,只要佢一日在任,就唔會再有一個元老被處決。響佢在任期間,佢甚至將一個意圖行刺者放生。涅爾瓦在位期間,佢一直鼓勵元老院多參與帝國行政事務,或者因為咁,甚至有猜測認為涅爾瓦可能有興趣將近於君主專制既元首制,改為恢復羅馬共和國原有既協商政治政體。不過元老院似乎就對執政興趣缺缺,所以涅爾瓦最終都要靠自己既親信先可以順利施政。

涅爾瓦登位時,向所有羅馬公民(記住,係有正式羅馬公民權既公民先有)「派糖」75第納爾(Denarii),相當於一個普通羅馬工人階級兩個半月既工資。涅爾瓦亦都實行輕徭薄賦既政策,實行土地改革,向最窮困既羅馬農民發放國有土地,豁免5%遺產稅,並向擁有田產既地主以5厘低息發放貸款,幫助地主擴張產能,利息收益用於補助窮等家庭既小朋友。涅爾瓦一系列既經濟改革,有人話佢破壞左帝國既財政,因為稅收因而減少。但涅爾瓦就趁住呢個機會,整頓公元1世紀羅馬奢靡浪費既風氣。佢減少不必要既開支,獻祭、角鬥表演同戰車競技都因而削減,佢自己就遷出帕嫩坦山(Palatine Hill)上既大皇宮,將皇宮改為民用,自己就以羅馬城內維斯帕先既莊園作官邸。為補充帝國財政,涅爾瓦拍賣圖密善既金銀雕像、藝術藏品、珠寶首飾、甚至皇宮內既傢俱,基本上可以賣既都拎出黎賣。涅爾瓦任期內,羅馬帝國基本上處於休養生息既階段,開源節流,減少干預,任由經濟發展,為接落黎既盛世治世奠下穩固既根基。

涅爾瓦任內最後一個重要既決定,係關於繼承既決定。由於涅爾瓦無子嗣,所以佢冇可能世襲傳位。為避免羅馬再次陷入繼承混亂,涅爾瓦作出一個影響深遠既決定:將當時上日耳曼尼亞(Germania Superior)軍團中一個身經百戰、備受愛戴而又德高望重既優秀將領收作義子(adoptive succession)。呢位將領既名字將會留芳百世、名垂千古,佢就係羅馬大帝圖拉真(Trajan)。呢種繼承制度只係名義上既世襲,但兩位皇帝之間並無血緣關係,實質上類近於協商政治既混合體。通過過繼傳位既制度開創先例,後來既五賢帝,除左最後一位哲學家皇帝馬可.奧勒留良(Marcus Aurelius)傳位比兒子康茂德(Commodus)之外,一直行之有效。

圖拉真大帝雕像

圖拉真(Trajan)的文治武功
公元98年1月27日,久病多年既涅爾瓦駕崩,圖拉真同日順利登基。圖拉真並無皇室血統,甚至唔係羅馬城出身。圖拉真係公元53年響西班牙行省(Hispania)塞維爾(Seville)以北一個小城出生,爸爸係文官,圖拉真加入羅馬軍團後,從士兵一路升到統帥,足跡曾經遍及帝國東西南北各個角落。作為軍人皇帝,圖拉真重啟帝國既擴張步伐,征服多瑙河以北既達契亞(Dacia)王國,羅馬以外歐洲大陸唯一既集權王國,並將之納入行省。後期,圖拉真將注意力集中響東方行省,並發兵攻擊波斯帝國。結果曾經同羅馬帝國響西亞雙雄鼎立既波斯帝國戰敗,首都泰西封(Ctesiphon)響羅馬軍隊圍攻下城破。曾經擁有輝煌歷史既波斯帝國被羅馬打殘,淪為手下敗將,位於幼發拉底河(Euphrates)同底格里斯河(Tigiris)流域既核心領土被納入行省,波斯「萬王之王」被逼向羅馬皇帝俯首稱臣。


圖拉真(Trajan)半胸像

達契亞戰爭(Dacian War)當中正利用輕弩砲(ballista)瞄準敵人既羅馬士兵

圖拉真既對外戰爭,將羅馬帝國版圖推至巔峰。全盛時既羅馬,北起不列顛尼亞既寒冷高地,南至尼羅河流域,今日蘇丹灸熱既滾滾黃沙;西起面向大西洋既葡萄牙,東至波斯灣、里海以及伊朗高原既西陲。陸地領土面積600萬平方公里,加上對250萬平方公里既地中海行使司法管豁權,統治約6000-8000萬人口,佔當時世界總人口既20-25%,使羅馬一躍成為當時世界最大、最強盛既帝國。

公元117年全盛既羅馬帝國

公元117年既世界,四大帝國由西至東:羅馬(有少少錯,因為冇顯示黑海以北領土)、波斯、貴霜(印度)、漢,四大帝國佔去當時世界超過一半既人口

歷史上第一次全球化(Globalization)

羅馬經濟同貿易響太平盛世之下發展,高峰時期,羅馬人既海運商品貿易北及歐洲北部斯堪的納維亞半島(Scandinavia),南至東非索馬里甚至肯雅;西起大西洋中既金絲雀群島(Canary Island),東至印度、印支半島,及後分南路到達印尼,走北線進入中國,最遠去到日本。響日本京都府長岡京市宇津久志1號古墓曾經發現從羅馬出口既玻璃器物,而響龐貝古城既遺址就發現從印尼進口既香料,講到呢度,可能大家都有d驚訝,原來全球化(Globalization)根本唔係咩真正新穎既現象。

公元1世紀既「全球化」(Globalization)現象,講圖拉真廣場時會有更多涉獵

在日本古墓出土的羅馬玻璃器物。古羅馬時代貿易線路讓商品出口遠達世界另一端的日本

對外戰爭亦為國庫帶黎可觀收入,而大批外來人口湧入既羅馬城,歷史學家普遍估計發展至100萬以上人口,係當時毫無疑問世界最大既城市,大部分居民都住響磚石混凝土結構既多層式住宅大廈。公元1世紀末到2世紀初既羅馬詩人馬提亞爾就曾經寫道,一位住響頂樓既窮等人家要行200級樓梯先返到果間細小既湯房*(Epigrams Book VII, XX)。如果呢個數字唔係詩意既誇張,咁詩人筆下呢位可憐既湯房客應該住響10樓(!),幢大廈就有成40米高,即使當發水40%打個6折,都仲係有成6樓咁高(唔好唔記得呢個係2,000年前既世界)!

圖拉真皇帝有大國君王既氣度——尊重元老院,寬容民間異議,響軍中亦都有好高威望。由於公正、賢明、務實既處事態度,加上文治武功,圖拉真既係少數中世紀期間被高度評價既異教羅馬皇帝。圖拉真亦都留低無數公共建築,當中有驚世駭俗100公里長既隧道,有蘇伊士運河既前身,足夠後人驚嘆為鬼斧神工。

我地就從圖拉真為攻打達契亞時所興建既第一個超級工程:
橫跨多瑙河既圖拉真大橋(Trajan’s bridge)開始講起。

*詩句原文:Haec per ducentas cum domum tulit scalas seque obserata clusit anxius cella gulosus ille, postero die uendit. 拉丁文ducentas就係第200既意思。英譯版本可參者呢條link:http://www.tertullian.org/fathers/martial_epigrams_book07.htm