上次寫篇羽觸Review擺到明趕客,新手未必明,支筆又唔係易買到⋯⋯今次整返啲正常夾大路嘅嘢,講下玩筆基本知識同埋有咩筆推介俾Fountain Pen Beginner使用。首先,大家睇埋落去之前可以喺FB加入返「鋼筆、自動鉛筆情報局(香港)」先,呢個Group係堆Pen Lovers交流嘅地方嚟嘅。

一支筆基本分為筆尖(nib)、筆舌(Feed)、握位(Section)、筆身(Barrel)、筆帽(Cap)四個部份,另外仲有一個儲墨機構(Ink Reservoir)。其實仲可以再詳細分落去,大家有興趣可以上一上Jetpens/ Gouletpens度睇下。

撇開樣貌協會嘅準則唔講,一支筆最重要都係個尖。(好似係,除非唔係。)拋開某啲廠家嘅筆,會有啲極幼(例如:Platinum #3776/ President 嘅UEF)、極粗(Pelikan M Series嘅OB、OBB、O3B)甚至好似Pilot Custom Series有好多特殊尖(有軟有硬咁啦),單純由粗幼講起,常見嘅有:
EF: Extra Fine
F: Fine
M:Medium
B: Bold

較常見嘅特殊尖型又會有MS(音樂尖)、Italic(斜體尖)、SF Nib(Soft Fine)呢啲,都係好多中階筆已經會生產備有嘅特殊尖。當然特殊尖型或者係極端粗幼嘅尖型多數都係難買到,需要海外訂返嚟。另外需要注意嘅係,各大筆廠,其實套尖粗標準都略有差異,粗幼唔會一樣嘅。唔同你買電話個USB頭,一條線可以周圍隊。(咦!?)但基本上可以分開做「歐系」同「日系」兩大規格。

日本以前內銷嘅老筆好多都會沿用漢字表示粗細,好似用「中字」、「中細字」、「細字」等嚟對應返Medium, Medium Fine, Fine, etc,宜家就統一都用英文字母表示。日系筆尖係會比歐系細一個碼,例如日系嘅Medium,寫出嚟嘅筆幅同歐系嘅Fine係差不多大。就好似,買衫嘅Size咁,啲歐洲Size就算係S碼,可能係亞洲人著開嘅M咁樣。

而除咗歐、美、意、法、德、日之外,台灣其實都有鋼筆品牌。例如天益、老山羊、三文堂(TWSBI)、尚羽堂、SKB呢啲。佢哋多數係向一啲有歷史有實力嘅歐美筆尖廠訂購筆尖,所以佢哋雖然係東亞品牌,但筆尖規格多以歐系為準。

材料方面,筆尖多數用金、鋼所鑄,但亦有用其他金屬嘅,例如台灣老山羊就有鈦尖。單就材質嚟講,金較為軟彈,按含金量(純度,純金比分為24份)可以分為14k (14/24,約58.5%)、18k (18/24,約75%)、21k (21/24,約87.5%);鋼、鈦等就相對較硬。但唔代表金尖就必定彈過鋼尖、鈦尖,透過合金嘅比例、筆尖嘅設計,亦都可以有做到筆尖具一定彈性。而且手勁大嘅人,用起金尖上嚟書寫體驗亦未必比鋼尖好。但用料反映賣價,係真嘅⋯⋯有好多低階陸筆(中國品牌)用嘅所謂鋼尖,其實係鐵皮尖嚟,並非使用優質鋼材製造,鐵含量會較高,用普通磁石都可以磁住個尖。加上低階筆多數亦唔會有銥點,以鋼替代。結果低階陸筆根本唔能夠寫。呢啲低質尖係長年使用之後仲會有機會出現銹蝕嘅情況。個人嚟講,真係唔建議新手貪便而去買一支低階陸筆作為嗰支好影響你以後對鋼筆嘅觀感嘅First Pen。講便嘅話,其實選擇仲有好多。陸筆之中可玩性高嘅選擇亦都唔少。

以下係一啲我會推介俾新手用嘅筆,考慮嘅因素主要有「價錢」、「外形」、「寫感(順滑度、中英文適性、筆尖回饋)「以及「入手、維護容易程度」,簡單去講係CP 值-「性價比」。由於我懶,所以只會Overall咁俾個分,10分滿分,唔會逐樣打印。

1.Platinum Preppy (7/10)
價  錢:約$20 HKD
呢支新手筆嘅優勢盡在佢嘅價錢。QC穩定,書寫流暢。有好幾種筆尖Size選擇,0.2 – 0.5。構造簡單,可以隨便改裝。
筆友評價:
Ring Tang:平靚正,一般人初初買筆十零蚊已經覺得貴, 新手真係要慢慢上先唔會嚇走。先用低價接觸下鋼筆,學下拎筆角度先啦。然後再跟上O ring玩換墨,望住d墨流下流下咁﹐就好易順勢入埋墨坑。你話我推Preppy? 我係上左O ring改裝後既Preppy。完!

2. Pilot MR (8/10)
價  錢:約$150 HKD
呢支筆十分抵玩,200有找可以有支金屬筆身嘅筆。夠哂墜手。筆身配重做得好好,重身,但長時間書寫又唔攰。作為低階筆,僅有F、M兩個Size可揀。兩個大細寫感都有相當大分別,細尖較為啜紙,好控一啲,新筆落紙會略感刮紙;M Size就行雲流水咁,好順滑。

筆友評價:
何麒:是咁的,呢枝筆雖則百九幾銀,但作為入門筆佢有金屬筆身,實屬少有,然後亦因為佢金屬身嘅關係會耐用D。另外呢枝筆構造簡單,新手可以學到唔同結構有咩用處,甚至要拆筆解剖都唔難。同埋雖則附送個個吸墨器唔多靚仔,但勝在易用。唧唧泵都唔識用你死L左佢啦LOLLOLOLOLOOL。完~~~~~~~~~ 898

Vicki Ho:推介Pilot MR3有數個原因
• 流暢好寫,不需要什麼技巧。如你是新手,也是第一次用鋼筆,這枝鋼筆會令你充滿信心,能流暢地寫出漂亮的中文字和英文字。
• 手感良佳,設計顏色均是一絕。MR3 具有鋼筆重量的手感,你真的感覺到自己在用鋼筆呢!而且,款式不錯,還有很多顏色以供選擇。
• 價錢相宜,購買方便。MR3 只需港幣150左右,鋼筆來說,不算太貴,真的物超所值。而且,你可在中南和其他鋼筆店便能買做,很易找呢!

3. TWSBI Eco (7/10)
價  錢:約$200-250 HKD
Pistol Fill(活塞上墨),所以墨量會多過其他用上墨器嘅筆好多。唔使怕唔夠墨。加埋透明筆身,你就可以睇到啲墨係裹頭浪下浪下。LOL

筆友評價:
Sun Chan:最平嘅活塞上墨筆,同時有個幾順滑好寫嘅Nib。外形又好睇,而且價錢唔算平唔算貴,新手睇得上眼。
Connie Wong:
• 價錢OK (我買既價係$252, 感覺>$200既鋼筆都有質素既保證)
• 吸入式可以順便推墨水坑
• 個人認為手感幾好, 好揸手
• 書寫順滑, 出墨量適中 (如KAWECO短鋼既水槍絕對會減低書寫既意欲)
• 容易入手, KUBRICK/ 喺「鋼筆情報局」搵AMAZON REX都買到
• 送禮自用兩相宜
• 透明既ECO相比起其他有色既ECO望上去感覺得體D”
Doris Tse:透明嘅筆身可以睇到入面墨嘅流動,加上出墨順滑,更是平價活塞筆之一 。「情報局」內又有Amazon Rex大神代購。(σ≧▽≦)σ
Fok Ka Ki:無他既,首先佢個筆桿粗幼岩岩好,我隻手係比較細既,咁證明女仔用到,男仔都會HANDLE到,唔會覺得太粗或者太幼,手感一流(唔好諗錯隔離呀);加上佢本身已經連埋吸墨器,新手用既時候就唔使另外再買,同時又可以認識埋吸墨器既原理,又慳番尐錢黎買墨,又實際又抵玩。同埋我係透明控丫嘛,ECO個筆身係透明既,梗係私心少少推介新手做透明控啦哈哈哈~仲有仲有,筆尖黎講,大多數新手會用既F同M尖都一樣咁好寫,F尖唔算刮紙,M尖更加係滑啦,所以無得輸架。重點係,佢唔算貴,新手黎講可以接觸到既價錢,即係「蔗渣價錢燒鵝質素」,咁多優點,仲唔岩晒新手?

4. Lamy Safari (6/10)/ AL-Star
價  錢:約$200-250 HKD/ 約300-400
Safari呢支筆好耐之前已經俾啲高登仔吹到天上有地下無,神兵利器咁樣。如果你摷返啲舊PO出嚟逐個追返,有咁上下筆齡嘅筆友應該係得啖笑。Safari個尖無疑係好寫嘅,佢同Preppy、MR呢啲日筆唔同,筆觸偏硬,好啱日常用嚟記事抄嘢嘅。但其實佢近年嘅QC,好多人都報告話差咗好多。新手冇經驗,就變相有啲考人品。可以試嘅話,試啱嗰支寫落OKAY先扑鎚啦。同埋Safari筆身其實只係塑膠嚟,而且佢個螺紋位都幾易扭過龍,有強迫症嘅人唔好不停捽、用死力扭。扭實就算,否則愈搞愈鬆。作為日用筆,德國設計又真係冇得彈嘅,有觀墨窗之餘佢個筆夾真係萬能插來,咩嘢都可以好輕鬆隊落去。(面壁過隔離排隊唔該。)

如果預算充足可以選擇佢嘅金屬筆身版本-AL-Star

筆友評價:
KS Wong:筆尖偏向硬,寫字時感覺接近roller筆,相信對新手來說較易適應和控制,握手位獨特設計有助學習正確握墨水筆手勢,岀墨量適中,沒有刮紙感覺,非常順滑,筆咀可同時應付中英文寫作,價錢都算親民,有多種顏色選擇,筆咀又可輕易替換,直插式筆套方便日常應用,入門首選。
Yeung Ka Yan:有品質保證,書寫性能合於水準的表現,又不貴,CP值很高,仲有多種顏色可以選擇,所以很適合菜菜鳥用

5. 金豪X450/ X750 (8/10)
價  錢:約$20 RMB
呢兩支陸筆抵到爛。點解咁講?係因為筆桿選擇多,Pattern、顏色多揀選,夠靚。寫感對得住價錢有突。Goulet、台灣嗰邊都大推。最緊要係佢同TWSBI一樣,可以換尖,你買返嚟玩到厭,可以淘個尖或者上國外其他網站買啲有保證嘅靚尖嚟裝返上去,又可以繼續毒落去。

除咗上述5支之外,受歡迎嘅新手筆仲有好似「無印」嘅長/短鋼筆、「Pilot」微笑鋼筆、Sailor Clear Candy、大創鋼筆等等。唔推薦嘅原因不外乎係難買、寫感與價錢不成正比或者係考人品之類。(戴返頭盔,撇開人品問題,寫感嘅嘢有時好個人,我啱唔代表你啱。上邊都係個人意見。)不過多人捧,都List返筆友嘅睇法出嚟俾大家參考下:

6. Pilot 78G (By Nox Ching女皇)
價錢:約$100 HKD
當全世界都推緊用微笑果陣,我已經將微笑打入左冷宮。無法,佢既外觀,手感其實無想像中咁好。作為推坑既新手筆,係價錢、耐看、手感都要考慮周全,咁先可以繼續吸引人繼續敗0,0。我個人推78G,價錢不比微笑差,都係100內左右有交易,而且大方得體,出街見得下人,至少我係學生面前都唔覺得孩子氣先。雖然話推坑之作(文),但我都帶個頭盔先:鍾意同手感既野,自己試過先真,歡迎參加筆聚試唔同筆先最實際。

7. Pilot Kakuno(微笑鋼筆)(By Doris Man)
價錢:約$80 HKD
微笑鋼筆有握筆位,幫助糾正執筆方式,新手練好後,寫嘅字都靚D啦。而且睇住筆尖上嘅微笑,都會更有動力去練字,心情都會變好啦!

8. Daiso Riviere(大創鋼筆)(By Wanying Wong)
Daiso鋼筆中全身白色插白金卡水呢款,傳說都係睇人品但我呢方面一向差,不過手上呢枝除左開始有少少刮紙,之後係越寫越順,勾撇點劃都做到,而且唔似微笑果d下下都浸透張紙。新手落筆遲疑好家常,呢支筆會俾到時間你遲疑。當然佢都有唔好,筆夾好易甩同埋白金卡水又貴又少色揀仲有傳說中人品問題,但個人認為作為一支12蚊ge鋼筆真係CP值好高。唔放心人品近排又有fd去日本可以試下由日本買番黎,因為日本人對QC好有要求,就算made in China都係。不過就算香港買感覺都抵玩過陸筆,我手上呢支由上年八月(2015)用到依家都好好地~

上邊堆筆嘅購買地點可以參考下邊呢個表:(利申:冇收過任何外國資助。好似係。)

鳴謝:(以下排名按筆劃排序)
Connie [email protected](香港)
Doris [email protected](香港)
Doris [email protected](香港)
Fok Ka [email protected](香港)
KS [email protected](香港)
Nox Chung(女皇)@鋼筆、自動鉛筆情報局(香港)
Ring [email protected](香港)
Sun [email protected](香港)
Vicki [email protected](香港)
Victor Wong(經理)@鋼筆、自動鉛筆情報局(香港)
Wanying [email protected](香港)
Yeung Ka [email protected](香港)
[email protected](香港)