帝國驕雄
An Empire at its height

今季,我地會見證住弗拉維王朝(Flavian Dynasty)的終結,亦都見證住一系列非血緣關係繼承既皇帝。呢批以個人才華同實力晉升,然後過繼為上任皇帝義子並接任皇位(adoptive succession)既君主治下,羅馬帝國得以繁榮昌盛的時代。我地將呢五位統治羅馬帝國百年盛世的賢君統稱為:

五賢帝時代(Five Good Emperors)

五賢帝大理石頭像,按年份排列。從左至右為:涅爾瓦(Nerva, 公元96-98年),圖拉真(Trajan, 公元98-117年),哈德良(Hadrian, 公元117-138年),安東尼(Antonius Pius, 公元138-161年),馬可.奧勒留良(Marcus Aurelius, 公元161-180年)

五賢帝既管治下既一個世紀,羅馬帝國既國政保持穩定,政治、外交、經濟、軍事實力到達巔峰,無論文治定武功都發展至極盛;

《羅馬帝國衰亡史》既作者愛德華.吉本將之稱作「人類歷史上最幸褔既時代」(雖然吉本講既野必須小心衡量可信性)
《後漢書》形容世界彼端既帝國「穀食常賤,國用富饒」

五賢帝統治時代,亦都係羅馬建築史一個非常輝煌既時代,好多偉大既建築留存至今,好多既工程成就仍然令人驚嘆無比,部分創下既建築記錄甚至保持至今未被打破。

一連兩季,筆者會帶大家走過羅馬帝國既盛世,見證住一個又一個膾灸人口而永垂不朽既建築史傳奇。



五賢帝年間羅馬帝國國力極盛,成就一個又一個令人難以置信的超級工程。羅馬人所修建既基建,當中有唔少直到今日仍然服役,例如呢條位於西班牙行省,已經1,900年歷史但仍然可以承載重型貨車駛過既羅馬大橋。

歷史背景(上)
弗拉維王朝(Flavian Dynasty)既終結

響上一季,我地講到弗拉維王朝既維斯帕先(Vespasian)同提圖斯(Titus)呢對父子兵,兩位都係優秀既軍人,而兩位都係冇奧古斯都既皇室血統,純粹係因為特殊既歷史背景同繼承混亂上位,打開左非血緣繼承既先河。弗拉維王朝期間,我地見證住羅馬鬥獸場(Colosseum)呢個地標拔地而起,亦都見證住維蘇威火山(Vesuvius)爆發掩埋左龐貝古城(Pompeii)同赫庫蘭尼姆(Herculaneum)古城。時間好快就到左弗拉維王朝最後一位皇帝——後世稱之為悲劇暴君既圖密善(Domitian)(在世:公元51年-96年)。

憂鬱的詩人王子
講返圖密善(Domitian)呢個人,佢係維斯帕先(Vespasian)既細仔,古羅馬史學家形容佢後生時外表英俊瀟灑、面色紅潤,喜好文藝,精通詩詞歌賦,不失為一個年青有為既才子。但蘇埃托尼烏斯(Suetonius)寫道,圖密善既眼神往往帶住憂鬱同黯淡,一個多愁善感既才子。佢呀哥提圖斯(Titus)唔同,圖密善唔係響沙場上打滾長大;當佢長兄同父親在外打仗時,圖密善就留響帝都羅馬讀書。而當維斯帕先從猶大凱旋進城既時候,圖密善就被封為執政官。

同之前既暴君卡利古拉(Caligula)同尼祿(Nero)唔同,圖密善(Domitian)係響一個叫做正常既家庭長大,佢老豆同大哥都係軍人出身,家世清白。佢童年時接受良好教育,修習文法同修辭;既唔係卡利古拉咁響提比略既鐵腕之下扭曲所有價值觀,亦都唔係尼祿咁有一個蕩婦媽媽,並響極其淫亂、暴戾既家庭中長大。圖密善僅僅19歲就即任羅馬執政官,或者正因為佢根本冇參與過猶太戰爭就無端因父蔭而獲得萬人景仰既權力同地位這不勞而獲既背景,令到佢思想同行為上有所偏差,間接種下未來殞落既禍根。

記念圖密善兒子神格化(deification)既銀幣,圖密善兒子公元80年出生,早夭

榮登大位:理想同理實
響做執政官期間,圖密善(Domitian)經常響父兄在外時自把自為,甚至佢老豆都對呢個細仔頗有微言,但提圖斯(Titus)就對細佬百般容忍。從圖密善既觀點睇,佢就覺得佢老豆處處制肘佢,唔比佢立軍功。維斯帕先(Vespasian)公元79年駕崩後,提圖斯順利即位,但佢既皇位只係維持左2年多少少,公元81年,提圖斯(Titus)響意大利中部地區病逝,後世既史學家有人懷疑佢係被圖密善以有毒海螺毒殺,但呢一切都只係流於傳言。咁由於提圖斯冇子嗣,所以響公元81年,佢細佬圖密善繼位為弗拉維王朝第三位,亦都係最後一位皇帝。

圖密善即位初期,大家都好鐘意佢,尤其軍隊;一來因為佢老豆同大哥係好受歡迎既將領,二來佢加左軍隊人工。雖然圖密善對武將唔錯,但羅馬帝國官僚體系當中既文官就冇咁好彩。

圖密善記念進攻日耳曼尼亞戰爭既金幣

進攻日耳曼尼亞戰爭既記念幣(銅錢)

悲劇暴君圖密善
響圖密善(Domitian)統治既後期,歷史記載指斥佢為一個殘暴既獨裁者。雖然現代史學家通常都認為呢d記載有誇張其實,但佢強化專政集權、削弱元老院權力甚至同元老院敵對、將同自己作對既元老(Senator)放逐或以莫須有甚至子虛烏有既罪名放逐或處決都係事實。羅馬帝國傳統上言論管制其實好鬆,但圖密善倒行逆施,大興文字獄制造白色恐怖。除此之外,圖密善對猶太教徒進行逼害,亦都有某d證據指基督教徒同樣受到逼害(現代史學家認為有爭議),所以響猶太人同後期既教會當中,呢位皇帝名聲都係好差。圖密善好自戀,響佢任內重新強化皇帝崇拜,甚至自封神明。除左自戀,佢本身個人亦都疑神疑鬼。蘇埃托尼烏斯(Suetonius, 同圖密善同一年代既人,圖密善死時呢位作者大約25歲左右)《十二帝皇傳》(The Twelve Caesars)就有記載,占星家曾經預言圖密善響公元96年9月18號中午左右會遭到刺殺,自此以後圖密善變得極度偏執,懷疑身邊既所有人都有陰謀想害佢,然後就先下手為強,亂咁處決佢睇唔順眼既人,皇宮內腥風血雨、人人自危。

位於羅馬既圖密善競技場原址,傳統認為呢度係殉道者既地方,但呢個講法目前存在爭議

自我實現的刺殺預言
或者係因為咁,呢個預言就成為左佢一個自我實現既預言。當圖密善將佢既秘書處決後,佢管家Parthenius以及一眾同謀精心策劃。或者呢班同謀都好清楚個預言,所以正正就選擇響占星家預言既公元96年9月18號行刺圖密善。當日,圖密善不斷咁問身邊既人而家係咩時辰,咁岩佢既侍從就係同謀之一,就專登講話已經過左中午,等佢放鬆警戒。對於迷信既圖密善,呢招竟然非常奏效,結果佢心情輕鬆,打算去沖返個靚涼。呢個時候,刺殺同謀者按部就班咁演出佢地預先擬寫好既劇本,斯提芬尼烏斯(Stephanus),圖密善一個侄女既侍從扮成有急事,將計就計扮成要告發行刺陰謀黎引開圖密善。之後既劇情,就真係十足荊軻刺秦王。斯提芬尼烏斯預先幾日已經開始用夾板同繃帶包住自己隻手扮受傷,而刺殺當日,繃帶入面收埋左一柄匕首。當佢將遞左張紙比圖密善,佢就即刻圖窮匕現。圖密善激烈反抗,斯提芬尼烏斯最後響混戰期間被圖密善殺死,而圖密善自己亦都傷重不治。最後,呢位英俊既悲劇暴君響佢在位既第15年結束左佢既一生,得年45歲。

弗拉維王朝既終結
圖密善死後,元老院迅速響同一日(公元96年9月18號)推舉已經66歲既元老涅爾瓦(Nerva)登位,並對圖密善處以記錄抹消(Damnatio memoriae)既懲罰,避免左羅馬帝國因繼承混亂而陷入內戰。涅爾瓦(Nerva)既登位,宣告左弗拉維王朝(Flavian Dynasty)既終結,亦都宣告一個新時代既開始。羅馬帝國正式進入五賢帝(Five Good Emperors)時代。