分享一個細個聽過嘅故事。呢個故事係我讀小學時睇人生第一本英文書,書名同故名都唔記得,但係內容就印象深刻,曾經令我好多晚瞓唔着覺。

一對老夫婦住喺偏遠山區一間大屋,有一個落大風雪嘅夜晚,佢哋聽到有人敲門,原來係一個行山盪失路嘅男人,請求留宿一晚,老夫婦一口應承。

第二朝,風雪開始停,男人準備離開。臨走之前,佢為咗答謝老夫婦,拎咗條羽毛出嚟送畀佢哋:「呢條羽毛有神奇嘅魔力,你可以向佢許三個願望,就會幫你實現。不過請小心啲用,夢想成真都要付出代價㗎。」

兩夫婦半信半疑,不過許個願都冇壞,就講咗個最多人想實現嘅願望:「我想發達。」講完,羽毛仍然冇動靜,天上亦都冇即刻跌舊錢落嚟,兩夫婦一笑置之。

但再過多一日,佢哋就收到電話,係當地警察打嚟:「你哋個仔喺工廠做嘢時出咗意外,畀機器夾死咗!」事後,兩夫婦獲得保險公司一筆巨額賠償金。

發生咗件咁嘅事,兩夫婦當然悲痛莫名,呢個時候先記得男人講過,「實現願望要付出代價」。老太太情緒崩潰,突然佢諗起仲有兩個願望未用,於是就拎起條羽毛講:「我要我個仔返嚟我身邊!」

喺隔離聽到嘅老伯大驚,一手搶咗條羽毛:「唔可以再許願喇!你唔記得上一個願望令我哋付出咗好慘痛嘅代價咩?」老太太喊住咁講:「我唔理,我淨係想要返我個寶貝仔!」

「咯、咯、咯。」呢個時候,門口突然傳嚟幾吓死氣沉沉嘅敲門聲。時值深夜,更令人毛骨悚然。不過老太太似乎好高興,即刻衝向門口:「呀仔返嚟喇!」老伯見狀即刻拉住佢,「唔好開門!人死不能復生,呀仔已經走咗㗎喇!出面嗰隻唔理係乜嘢,都一定唔係呀仔!」

「咯咯、咯咯、咯咯咯咯。」兩夫婦糾纏期間,敲門聲越嚟越急速,越嚟越唔耐煩。就喺呢個時候,老伯突然諗到啲嘢,於是立即拎起條羽毛:「我要出面嗰隻嘢即刻消失!」

老伯講完呢句,敲門聲終於停止。老太太坐喺度不停咁喊,但係老伯唔介意,因為佢知道自己避免咗一場浩劫。