一對情侶喺傍晚時份揸車嚟到樹林,泊咗喺一棵大樹下面,貪呢度夠隱蔽。然後,佢哋就喺車入面做愛做嘅事。

完事之後,天已經入黑,情侶發現架車撻唔着。男人落車檢查之後,同女朋友講:「油缸冇油,我行去最近嘅油站買汽油返嚟,你喺車上面等我。」

女人喺車入面一直等,一個鐘、兩個鐘過去,男朋友都仲未返嚟,佢開始擔心。突然間,女人聽到車頂傳嚟「躂、躂」嘅聲音,令佢有啲驚,不過佢好快就諗,應該係垂落嚟嘅樹枝。

男朋友完全失去消息,女人愈嚟愈惶恐,最後佢忍唔住瞓着咗覺,「躂、躂」嘅聲音不絕於耳。醒返之後,天開始光,女人聽到外面有腳步聲,佢好開心,心諗男朋友終於肯死返嚟。但係佢望出車窗,見到嘅係一個警察。

警察同佢講:「小姐,麻煩你行出嚟,但係千祈唔好擰轉頭。」

女人打開車門,行咗落車。佢當然冇聽警察嘅勸告,擰轉頭睇吓咩事。嗰一刻,女人見到自己男朋友倒掛咗喺汽車旁邊嘅大樹上面。男人嘅喉嚨被割斷,血一滴滴咁滴落嚟,佢一對垂落嚟嘅手,五隻手指啱啱好掂到車頂。

* 作者按:文章內容整理及翻譯自網上都市傳聞