如果要我數香港人一樣最麻煩嘅行為,自拍一定係首選。

如果你問我有咩地方有機會令人挑起條癮自拍,我會答你要搵一個冇機會嘅地方先難。因為就算係一個日日返工嘅OFFICE都好,FACEBOOK上總有人耐唔耐就放一張自拍話好攰、好辛苦、好想去旅行之類。

當然如果純粹呻下都無妨,喺OFFICE自拍你影響到邊個?最唔鐘意你咁做得老闆嘅姐。但係睇個畫展都要自拍又係咩一回事?畫就得咁多,個個企哂喺畫面前一係摸幅畫、一係自拍、一係摸住幅畫自拍,搞到工作人員都要地下痴紅膠紙SET禁區。不過香港人一於小理,大家都是梁特首,禁區自出自入如入無人境。Joan Cornellà啲畫係出名,係好笑,但唔該你記住個畫展好多人,一但你一個或者一班撚人企喺幅畫面前大家就少一幅畫睇,你話果陣開唔開口屌你好?

好多人乜都要影,由開始影到完,全日對眼就係望住部電話。你問佢果度靚唔靚,佢會比好多自拍相你睇,但你問佢除左相仲見到咩正嘢佢答唔到你,因為佢見到嘅只係同你喺相見到一樣--佢塊面,佢根本冇留意果個地方嘅真面目一眼。唔止畫展,去旅行、演唱會、睇聖誕燈飾都好啦,好多人仍然只係活在電話,豐富自己相簿,但自己個腦仍然係乜印像都冇。

「唔自拍去嚟做乜?」係好多人,特別係女人嘅口頭蟬。我唔知「去咗」同「自拍」有咩關係,我淨係知因為自拍而令好多其他人白去--去到見到自拍神棍同對住電話影相嘅人仲多過見畫。如果自拍就係你存在意義,我會建議你去唔會點阻住人嘅地方,下白泥又好、城門水塘又好、自己屋企仲好,影足七七四十九個鐘都冇所謂。有好多地方你要帶嘅係一對眼,一個腦,而唔係果個長時間開住嘅相機APPS。

圖片來源:Joan Cornellà