出到街,見到個劉江華好似唔同咗,原來係個口改細咗。

容量冇變,想單靠改細個口就令人更自律咁將大件垃圾扔去垃圾站,就好似而家仲有班人以為遊行叫口號就可以改變政局咁無知。依個理念仲要係換完劉江華先由新聞講兩句,你係有心搞最起碼換之前賣多啲廣告話比人知你點諗下話?有邊個會一見到個新劉江華就知道你嘅「苦心」先?

  望望台灣,除左捷運酒店商場之外垃圾桶真係稀有物品。大家都知道台灣對廢物處理有嚴格要求,我諗如果唔係要方便一下旅客嘅話可能台灣條街唔會有一個垃圾桶出現。只不過台灣對處理垃圾嘅經驗比我地高太多,人地除左減少垃圾桶仲會著重垃圾分類,再加上十幾年嘅公民教育先有今日嘅成果。

至於香港,你要喺條街搵資源回收箱,可能比台灣搵垃圾桶更難。冇得回收,咁人就自然扔落垃圾桶,垃圾自然就多,而依個問題唔係你整細劉江華個口就可以解決。香港政府開口埋口減廢,但到底有冇教市民點樣分類垃圾?唔係講緊賣兩個廣告就算,而係喺中小學講個TALK,甚至利誘市民每月扔小過幾多不可回收垃圾就減電費水費之類。你唔由細教佢地,或者唔比啲甜頭去改變佢地扔垃圾嘅習慣,就算你兩年後改細哂所有劉江華個口,垃圾量都唔會因為咁減少。

我唔知係咪政府用哂所有人力物力去奶中共鞋底同埋整死香港有良知班人,但凡有關香港民生嘅事政府一係唔做,就算做都做得好求其,包括今次劉江華之口。垃圾桶唔係令香港人製造垃圾嘅主因,個主因係分類意識不足、環保意識唔夠、仲有就係政府對減廢一直都冇乜實質支持。你唔去解決個主因,反而去改埋啲九唔搭八嘅細節,之後就同人講你喺減廢方面已經踏出重要一步,你到底係弱智定當所有香港人真係豬?

咁嘅屎橋都諗得出,難怪垃圾桶都可以做副局長。

圖片來源:網絡取材。