城大體育館冧天台,我第一日已對城大的校內調查不抱任何期望。首先大學建築物結構出問題,隨時會死好多人,涉及非常重大的公眾利益,絕對唔係城大閉門家事,校內調查不足以處理。再講,城大自己人查自己人,有腦都知唔會查出乜嘢結果。

我要講明,我唔會全盤否定內部調查和自己人查自己人。即使我認為香港需要有更高層次的調查,但件事係城大發生,咁城大自行調查,自己先向公眾交代一下,係好正常嘅程序。假如一間大學堅係開誠布公,就算佢用自己方式作內部調查,只要佢清楚交代自己的限制,坦白交代事件來龍去脈,釐清各種責任,公眾係會明白和諒解。

上文我用「假如」二字,因為事實係,我由第一日已看穿,城大根本唔會開誠布公。冧天台事件剛發生,我係facebook見到有啲城大教職員呼籲校友要客觀冷靜,唔好武斷地批評,要等城大的調查報告出來,大家好好分析。呢啲都係我好尊重的前輩,亦師亦友,我亦體諒佢地出於好意咁講,我覺得無謂跟佢地爭辯。

其實有腦都識得推斷,城大份調查報告唔會有咩公信力可言。香港早已禮崩樂壞到一個點,城大冧天台絕非個別事件。香港一眾高官及高級公職人員,逗人工和弄特權就至叻,但一旦出左乜嘢事故,就事不關己,推卸責任。沒多久前林鄭先至話鉛水事件,人人都有責任,咁即係沒有一個高官要個別為地為事件負責,兜一大個圈只係為左掩飾錯誤。

城大份冧天台報告又係咁。完全避重就輕,指出好表面的冧天台技術原因,甚麼天台承擔力不夠所以塌下云云。問題係,個天台唔會無緣無故自己加建和綠化,邊個下令去做這種大規模天台綠化工程?城大校內邊個部門阿頭負責監督工程?城大是否決策草率還是監管不力?呢啲深層冧天台原因,城大完全避得就避。而報告結論係:城大信錯左外人,並計劃對承建商採取法律行動。信錯左外人,根本唔係推卸責任的理由。你話普通市民唔識嘢會所托非人就話,一間大學,精英雲集,一眾高層每月向納稅人支取那麼高的薪金,自己點會無判斷能力?用人不當,本身就係一種罪過。城大第一件事要檢討的是自己的管治機制到底出左咩問題

當被問到天台綠化工程是否令人生疑,城大校長郭位竟然厚顏無恥地說:「城大不怕有錯,只怕不做」。我地平日鼓勵人去創新求變時,會說大膽做,唔好怕犯錯。但錯分好多種,其中一種叫致命錯誤(fatal mistake)。致命錯誤就是指那些會造成人命傷亡的錯誤,因此我地要用極之嚴謹的態度去面對。今次城大綠化天台倒塌冇死人,純屬好彩,但絕不能丟以輕心。身為一校之長的郭位,未認真檢討城大管治機制的漏動之前,就大言不慚地說甚麼「不怕有錯」,可見他骨子裡視人命如草芥,枉為人師!

冧天台成因未交代清楚,便有報導指出城大打算在原址興建多層大廈,成本數以億元計。公眾不禁要問:駛唔駛咁急又要再起嘢?從來白象工程都係利益輸送,貪污腐敗的溫床。如你問我對於城大多宗工程有沒有貪腐證據係手,這一刻我只能說沒有,我是用常理推斷。從城大工程決策過程之草率,到出事故掩飾真相的企圖,如果內裡沒有涉及不可告人的貪腐秘密,搵鬼信。維護香港廉潔守法的核心價值,這一刻我只能寄望城大內部出現告密者(Whistle Blower)!