小弟接觸鋼筆已經有六年,睇見近嚟好多人跟住風潮入坑,本來想先寫一篇Fountain pen beginner嘅心得分享。等新人易啲投入鋼筆,或者少使啲無謂錢,走咗遠路。但對上一個星期啱啱入手一支新筆,實在係愛不釋手。

「斷血流」呢個名頭,有一定年資或者留意台灣鋼筆圈嘅朋友應該都有所聽聞,但對於唔少人嚟講怕且仲好陌生。其實斷血流係台灣一位受尊稱位「大師兄」嘅前輩嘅牌頭嚟,造筆其實唔係佢主業,反而研磨筆尖先至係。聽聞「大師兄」用咗差唔多十年時間,拜師學藝修筆再自學研磨尖,先至有今日成果。而佢研磨出嚟嘅尖,究竟有幾好玩?真係好大驚喜囉!
13410671_1548046848830731_1720165606_o

呢支筆,以硬橡膠作為筆身。(硬橡膠與硬膠不同,並非ABS一類石油副產品,而係以天然橡膠加工而成嘅人工合成物料)硬橡膠對比好多材料都更加穩定、耐酸耐鹼,係一種可以經歷歲月嘅材質嚟。而佢其中一樣最特別嘅地方係帶有一種輕微嘅「燒車胎」味,而且上手感覺溫潤舒適。今次嘅羽觸並無太多花巧嘢,簡單嘅Barrel、握位,全部都恰度好處。

由於寫中文需要重覆提放,而羽觸以硬橡膠製作所以重量極輕,是為一大優點。將筆帽蓋於Barrel會令整個重心後移不少,長時間書寫之下會較易攰,小弟多數不會如此。
13405341_1548046842164065_806336360_o (1)

而羽觸尖,係打磨成好適合書寫中文嘅筆尖嚟。但與Salior 長刀研系列以及書法尖一類以寫出書法效果為目的嘅筆就有著明顯差異;反而同Platinum #3776有啲相似。首先出水方面,羽觸就比前兩者節制得多,筆尖又不至乾冷,落紙有輕、柔、順、貼嘅感覺。同陽剛味重嘅外型恰恰相反,有著一顆少女心。(這是反差萌!)#3776以強勁回饋同磨擦感而廣為鋼筆愛好者所熟知,羽觸相較之下順得多之餘仍留有相應嘅磨擦感,但並不比#3776來得滑。大師兄呢個尖有啲黏紙,啜得嚟又唔會阻滯你運筆。感覺上直劃橫劃更加易寫得好,又好出鋒。
13383707_1548051082163641_562743401_o

-羽觸尖側寫

而個人認為羽觸最神奇嘅地方係佢嘅筆幅同筆觸。羽觸筆幅唔大,比日系M尖略小。一般可以寫出日F至M左右嘅粗幼。但筆觸變化就不可窮盡。小弟試過用佢嚟雕米,寫出嚟嘅細字,一筆一劃都比用 #3776 EF更清晰分明。(當然要鬥細字極限,筆幅細一定贏。只係以寫細字嚟講,羽觸往往可以寫出更分明有美態嘅字咁解。)

要總結嘅話,羽觸比3776豐滿又比書法尖知分吋,係一支有儀態嘅筆嚟。

P.S>戴返頭盔:上述皆為個人感受所得,並不代表你都有同樣感覺。
13410515_1548046825497400_682356357_o

-劣字勿插唷~親