潮流界係一個極之龐大的產業,當中包括時裝、手袋、配飾、護膚品、化妝品、香水等。潮流界係建基於PR & Marketing的產業,又係人都知。消費者唔係傻,身邊有啲朋友,買一件有牌子嘅衫,佢一睇、摸上手,其實心裡已知道質料唔係最上乘,類似件衫,有牌子比冇牌子賣貴幾十倍,但佢仍然買得開心。因為大品牌的PR & Marketing做得好,成事件夠靚,令佢loyal to呢個牌子,買左有滿足感,明知件衫貴,都覺得抵畀錢佢賺。品牌價值超出產品本身,呢個又係PR & Marketing嘅常識。

若關公做得靚畀錢你賺又點話

明知件嘢貼個牌子賣貴咁多,做乜仲要花呢啲寃枉錢?有冇需要呀?Sorry!潮流界唔係同你講「需要」呢啲咁低層次嘅嘢。若論「需要」,人類只要有空氣、有水飲、食飽個肚同埋有瓦遮頭,就足夠了。食好西、着靚衫、化靚妝、住豪宅,通通都冇「需要」架!人類追求呢啲物質,就係想脫離原始動物性,提升自己,令到自己貼近仙界。點解消費者明知各大品牌或者甚麼潮流教主講啲嘢隨時搵緊你笨,但你都樂意follow,因為消費者一直覺得,班潮流界從業員,係住係仙界嘅人,佢地普渡眾生,教你點着衫,點化妝,教埋你用乜嘢護膚品keep到皮膚靚一靚,令你的肌齡逆轉。喂,佢地咁勁,你唔跟住佢地買嘢先至笨!

好一個爛寇,走出來倒米,將成個潮流界神話打破!爛寇係做生意就做生意,賺錢至上,唔好走去期望佢要同你捍衛乜鬼言論自由啦。政治咁Dirty,佔中好Annoying喎,一班潮流界神仙唔去碰政治呢盤禍水,絕對冇問題,但做乜鬼要走去搵何韻詩合作搞event?原來爛寇班PR & Marketing大員,真係個個係神仙,只不過係堅離地果隻,唔知何韻詩係乜水黎架!唔識何韻詩都識得佢師父梅姐丫,梅姐本身就係一個潮流界神話,同時梅姐亦自言係「民主運動的忠貞分子」,對中共最唔鍾意人提起的六四事件,梅姐在世時仍堅持要評論,更加拒絕跟中國大陸有任何合作。點知梅姐個徒弟仔何韻詩走得仲前,仲親身落場踢波,去年晚晚走落金鐘旺角唱歌吹水,係咁煽動啲人走上街佔領,危害國家安全。爛寇坐冷氣房班高層,唔係唔知丫嘛?

何不搵宇宙GEM?

你話唔想碰政治,咪搵Shiga囉,幾pure丫,上完ViuTV最近又有話題性。如果你話舐共係潮流,咁你咪搵宇宙GEM囉,紅到上太空,同爛寇一樣咁離地,好match丫。但偏偏要搵何韻詩,假係自己丟!公佈完同何韻詩搞event,跟住五毛報紙【環球時報】鬧兩句,爛寇就即刻跪低,已經夠曬樣衰。而潮流界係一個名利場,我知你係勢利鬼,見勢色唔對立即向權貴跪低都冇乜唔妥,但你可唔可以跪得型啲呀?班爛鬼民主派一話要走上門示威,你就又再次跪低,叫你班員工放日假唔駛番工。舐共你都唔舐到底,你驚乜鬼嘢人來示威先。舐左共好巴閉架,有主子加持,有人上門黎搞事,你咪Call警察,調動水馬閘住班刁民囉。無幾耐之前張得肛爺爺黎香港時咁威風,你唔係學唔到些少嘢丫嘛?

二次跪低樣衰到爆

爛寇這樣子二次跪低,反映出香港總部一班坐冷氣房的高層及PR & Marketing大員,個個方串大亂,進退失據。喂,唔好講係巴黎呢個全球潮流首都番工丫,即使係各大品牌的分區總部,能夠係呢度番工,已經係光宗耀祖,巧威威架,外面啲人唔識,當正你係神咁拜,以你做潮流指標。知道有friend係呢啲公司入面做,點着衫法呀,呢期興乜嘢化妝品呀,都要問過你地先安心。點知原來你地班友唔帶個腦番工,做嘢成pat屎咁,日後叫我地點跟呀?

做乜要俾錢你賺出糧俾庸才?

罷買爛寇以及佢所屬集團旗下產品,係為左懲罰呢間公司聘用埋一大班庸才。我作為消費者,我之所以有錢買膚護品,係因為我日日好辛苦咁番工賺錢。你話你個爛寇場Show做得好好睇睇,我用你啲嘢用得Happy,畀錢你賺下我都心甘命抵丫。但點知你地一個二個柒到無朋友,我做乜仲要畀錢你公司去出糧畀你地?你估錢真係咁容易賺?你係TVB咩,你播乜我睇乜。依家TVB都唔掂啦,套琅琊榜收視慘淡,睇到未?證明你出黎搵食想賺到人錢,真係要帶個腦番工架!

有朋友好擔心黎問我,話知爛寇衰,但真係不能罷買,因為當初買嘢果陣,爛寇個Sell屎姐姐話,一用就要用曬佢地成條Line的護膚品架,用啲唔用啲,效果唔好架喎。我同佢講,唔駛怕架,用護膚品嘅嘢,話轉就轉,根本就冇一定要用曬同一品牌呢回事!我同佢講,爛寇以及幾十個牌子,其實都係同一間公司做出黎。跟住我教埋佢睇,唔同牌子護膚品,其實都係來來去去果一堆主要成份做出黎。邊種成份係有效以及適合你皮膚就用啦。所謂牌子,完全係一場Marketing遊戲黎架咋。今朝仲用緊爛寇或佢母公司旗下嘅牌子,夜晚番去即刻轉用其他牌子就得,得左!

自己學識睇成份最着數

仲有,啲Sell姐姐講嘢你都好信?前線Sell屎係由公司總部坐冷氣房班大員訓練出黎架。爛寇總部班友都咁廢,佢地訓練出黎嘅Sell屎有幾屎,可想而知!班Sell屎無非係一堆士兵,執行銷售指令,無所不用其極咁氹你落搭洗錢買佢啲嘢架咋,佢地講啲嘢你千其唔好信!你估班Sell屎係為左你皮膚好咩,佢地為左佢自己個荷包有糧出架咋。講到底,自己要識睇成份。爛寇自己打破潮流及美容界神話,咁以後唔好亂信佢地啦,趁機會自己學多樣啲,豐富下知識仲好啦。揀真正實惠而適合自己的護膚品,省唔少錢,而且效果一定比聽佢地廢up好!