浪漫一個永恆既難題,基本上,浪漫係無標準定義。但都有幾個元素可以參考,好似係「詩意,童話,幻想」,客觀而言,只要用一些對方意料不及的方式,能令對方產生強烈的愛的情感,都可以叫做浪漫。

但係睇番上面個幾個元素,詩意......你估你係詩人咩?除非你係今時今日仲識寫詩,又或者你熟讀唐詩三百首,否則一個普通人那來的詩意?

詩意行唔通,咁童話又如何呢?聽就聽得多,有幾多人有本事寫個童話故事?又唔係安徒生再世。

所以,大部份人都會去咗滿足「幻想」,咩為之幻想呢?好多想做但冇諗過可以實現到既,通通都係幻想。例如突然拋開工作去遊行。

當然,以上既一切你都可以用錢去解決。現實係浪漫的確可以用錢堆砌(當然你可以話比女方知你係用錢堆砌,你只需要扮到付出咗好多心機,女方就自然會覺得浪漫),只要你有錢可以起一座公主城堡,你可以養你女朋友一世,佢唔洗番工,咁佢梗係可以隨時準備接受浪漫同你去一個突發既遊行啦。

最想講既係,浪漫其實好高風險,因為一旦失手,真的可以好大獲。尤其係東施效顰。

好似早排個位去到機場先同女友講去旅行既男子,我相信滿足咗好多打工OL既幻想,但係如果你貿貿然照做,到時女友彈你一句:「頂你!我有份文件要三點前趕起比老細架!玩、玩、玩!仲細咩?唔好咁幼稚啦!」到時就一啲都唔浪漫,你就由滿足佢既幻想變成你既幼稚。其實浪漫既風險係來自意料不及,意料不及先可以比到對方平時無既驚喜,但同時你就要做好萬全既準備。佢毫無準備,你要突然帶佢去旅行,就要事先幫佢偷偷地向公司請假,幫佢執好曬日用品、底衫褲、化妝品、護膚品、護照、計劃行程。

最容易出事既浪漫就係照抄,又抄唔足。求其係網上面見到話送花去公司浪漫就照做。傻更更走去女朋友公司打電話叫佢落黎,事前唔查下佢個日洗唔洗開會、唔查下間公司有冇位擺花、唔知女朋友係咪鐘意花、唔知公司大門洗唔洗職員證先入得。結果就算你買咗九十九朵玫瑰,只會換來對方一句:「做緊野,唔得閒。」

浪漫就好比買禮物,事先知道對方鐘意咩,出奇不意花心機偷偷準備,係對方需要既時候適時送比對方,令對方感到你對佢既重視。浪漫唔單止係心思(況且你都冇,多數人既浪漫咪又係網上抄番黎既),而係需要精心計劃,同埋強大既執行力。

柳臣fb:https://www.facebook.com/%E6%9F%B3%E8%87%A3-802134759816720/

作者簡介: https://www.facebook.com/%E6%9F%B3%E8%87%A3-802134759816720/