烏雲密佈,暖風放送,最好就係睇英雄片。戲院比天色黑,我先訓一陣。

片頭先播一段例牌音樂跟過數漫畫轉接,閃吓閃吓果陣就知我要起身睇。頭段講出Tony Stark 小時候跟外出父母告別,講自己撥錢搞科研,但遇到位老女人,道自己兒子於Sokovia 任務中被殺,被指殺人兇手,承接 Avengers 2 Age of Ultron ,然後,承接Captain America 2 Winter Solider ,講 Bucky 俾幾位白袍研究生數白欖咁對住本紅簿黑星喃嘸咁款,之後佢就大叫一聲嗚呀,就做咗一晚 ghost rider,追車殺一對夫婦。開頭好好,有睇過以上兩齣就應該引出成個畫面,將Tony Stark嘅心理起伏扯入成個故仔。

鏡頭一轉,就係黑寡婦、美國隊長眾人執行任務,又係追一暴徒,中間搞爛幾個建築物。嘅係,世界搞一個聯合國會議,睇晒復仇者聯盟搞爛幾個建築物,死好多人,尤指Sokovia,就成立個協議,管制成個復仇者聯盟, 117個國家都已簽晒紙。Tony Stark (Iron Man) 跟美國隊長雖然只是寥寥數句,但都劃出支持、反對議案的來龍去脈。佢多次講明自己研發良久,但害死唔少人,想收手,支持議案去贖罪。

美國隊長就直指議案將聯盟拉入官僚系統,易受監管,或野心家騎劫操盤。雙方就此分歧。故事另一伏線,就是聯合國會議途中,有人炸彈襲擊議員,於閉路電視中遙指Bucky 作做。美國隊長知道洗腦術,就早先一步搵Bucky,叫佢著草。自此,故事就開展了。

確實,有位野心家重奪果本紅簿黑星,再對被捕Bucky喃嘸咁款。我細心一聽,屌原來佢講德文。我仲以為係俄話,班人係共產黨員。鏡頭一轉,聯盟都因對協議睇法唔同而自我歸邊。隊長得悉有其他 Winter Soldiers 發難,於是出發阻止。點知,Tony Stark 知會行蹤,就到機場打起上嚟。中間或多或少,都有講及協議有乜漏洞,班人執行有幾廢。

電影上,聯合國派軍追捕,維持秩序都只會愈搞愈亂,仲要靠幾位聯盟成員查探。看乎現實,我哋成日都見到北約、美軍初期係咁空襲ISIS,但死傷多數係平民,仲衍生到庫爾德人獨立,土耳其跟 ISIS 私相授受。睇嚟套電影都幾反映到官僚點樣愈搞愈忙嘅喜劇。

認真探討人權、自由、假定無罪等等,其他影評或當今時事評論都略有提及。反而,我想由電影重心討論 Tony Stark 一人。野心家故意引晒 Bucky 、隊長、Tony Stark 到秘密基地,播片講Bucky殺佢雙親,於是又打架。野心家自己都講幾次 Empire Falls。Tony Stark 於 Avengers 1,2 中都講及自己不斷研發創新,去改變世界。今集講述Tony Stark 自己雙親俾Bucky殺,聽到隊長以俾人洗腦去辯護Bucky,都要化身 Iron Man 殺死對方報仇。

人遇到新時機,學習新事物,時間日久,自然想回饋社會。隊長化身特工保護美國,Tony研發創新,原意皆一樣,唯每次大亂都由Tony研發途中遇上奇怪意外,災難瀕生。佢以為停止研發就可以解除內疚,但總有人會現身搞亂。其實,係佢總係看得自己太高,不懂人情世故,深信官僚主義。 隊長一早知曉,最終離去,只留低一個電話。

因為,帝國隕滅,從來都唔關外圍人搞事,而係源於盲目相信制度嘅人。Tony 出生至今都沿用昔日制度成為富豪、發明家,思想都係困窘於過去嘅遊戲規則。今集,佢身心受到考驗,能否由內戰後克服,還望明天。