台妹深得港男歡心唔係新聞,因為無論把聲、個樣、身材,好多人都覺得拋離港女一條青山道。試諗下一個人靚聲甜嘅女仔對住你笑容滿面咁講一句「你要不要試一下這個哦~」真係人都癲,特別係個「哦~」字可愛得嚟唔做作,嗲而不姣嚟講我諗台妹可以係世界TOP3。只不過台妹係咪真係咁完美,而港女又係咪真係差咁多呢?
  
關於台灣多靚女我唔否認,每日出街由靚嘅、有氣質嘅、鄰家Feel到GFABLE你都唔難遇到,但其實同樣情況,你出到尖咀銅鑼灣都會見到好多OL同靚女,出街飽眼福並唔係台灣專利。但點解香港男仔會覺得台灣女仔吸引好多?當然你可以講隔嚟飯香,但亦都同香港女仔比較緊貼潮流有關。每當香港興起一樣嘢,大家都會第一時間跟風,就好似一興起韓妹LOOK成條彌敦道都變左韓國街咁,個個女仔打扮都大同小異,就算係靚都好啦,望得多都會有麻目嘅一日。但台灣女仔除左跟風,好多都會識就住自己先天優點去襯衫,結果就令到男士們望完一個可愛LOOK後又見到一個清純LOOK經過,真係每次偶遇都有驚喜。男仔鐘意新鮮感,而打扮各有不同嘅台妹就啱哂胃口,所以就造成左大家普遍對台妹印像較好。
  
除左外表,大家都話台妹親切好多,對住你幾時都係笑住咁。雖然由台男口中得知好多台妹其實可以比極品港女更極品,但就第一印像嚟講台灣人真係比香港好好多。你幾可會見到香港七仔個收銀收你錢後雙手找散紙比你再講句「多謝哂下次再嚟」?係有,但我去一個禮拜台灣可能見得多過一年喺香港(OK例外,服務好七仔好多)。香港工時長,壓力高,黑面指數長期喺世界前列,佢地句多謝哂個語氣一係就機械式,一係就死老豆咁。但我喺台灣有次買咖啡企係度望住個牌分幾鐘,個台妹就就一直企喺我隔嚟,推介下有咩好飲,笑得自然,語氣仲要愈聽愈舒服果隻。雖然最後杯咖啡冇乜特別,但係望住佢個笑容,真係覺得比錢佢賺都值嘅。當你同個女仔講嘢,一個黑住面,一個笑到瞇埋眼咁,又真係好難怪咁多人對台妹偏心。
  
不過點講都好,我覺得最主要嘅理由都係「人地嘅好似好啲」依個因素作怪:去外地旅行會留意靚女,返到香港就覺得十個港女九個醜,靚果啲只係少數例外。其實唔止香港人,好多人都鐘意睇外人嘅優點,然後只睇自己友缺點,結果就搞到你睇我好,我睇你好咁。你用人地最TOP果班去睇自己最差果堆,得出個結論就當然係人地贏到開巷,但咁其實對香港女仔唔多公平。台妹係好好,但我一樣識到啲唔比台妹差嘅港女,何況同聲同氣依點就算幾完美嘅台妹都做唔到。愛台妹嘅同時不妨除一除副眼鏡再留意一下香港女仔,話唔埋其實有個啱你心水嘅原來就喺附近呢?