尼祿登位
尼祿響公元54年成功登位,羅馬既腥風血雨先岩岩開始。


阿格里皮娜為尼祿加冕雕像

母子相殘
尼祿本來就自我中心到極點,逐漸長大既佢變本加厲。阿格里皮娜安排比佢既老婆:先皇公主奧緹維亞本身係個高貴、為人正直、深受人民愛戴既皇后,但尼祿就偏偏好憎佢,因為覺得呢個老婆好悶、好冇情趣,於是佢就不斷同其他女人外遇,最後仲搭上左一個奴隸出身既女仔:克勞狄雅.亞蒂(Claudia Octavia)。阿格里皮娜激烈反對,而尼祿瘋狂戀慕對方,於是同樣激烈反抗決定,呢件事成為左兩人反目成仇既導火索。另一方面,阿格里皮娜既控制狂做法亦都將尼祿推向瘋狂。阿格里皮娜對兒子唔聽話行徑不滿日增,開始Plan B,秘密扶植不列顛尼烏斯(Britannicus),當尼祿知道後,不列顛尼烏斯既日子就已經屈指可數。


阿格里皮娜(Agrippina)同尼祿(Nero)頭像同時出現響發行既金幣上,阿格里皮娜初期權傾朝野

殺!殺!殺!
尼祿既下一個受害者,就係先皇親生仔不列顛尼烏斯。頭先講到尼祿為左感情問題,不惜同自己老母反目成仇。佢上位冇幾耐,就將老母逐出皇宮,又派僕從去佢居住既皇室莊園打擾佢、整蠱佢。翌年,為斬草除根,尼祿以毒芹加入清水,再將清水混入不列顛尼烏斯飲既酒入面。尼祿既陰險似足佢老母,由於不列顛尼烏斯天生有癲癇(俗稱發羊吊),所以中毒身亡既徵狀同病發死亡非常相似,加上毒藥加響水而唔係酒入面,銷毀證據就更加容易。結果不列顛尼烏斯被草草下葬,尼祿登位唔夠一年,年僅14歲既不列顛尼烏斯就慘死響尼祿毒手。


童年時不列顛尼烏斯(Britannicus),克勞狄(Claudius)同梅莎麗娜(Messalina)生的皇子,全身像

57年,尼祿既朋友奧托搭上左另一個攻於心計既女人:波佩亞(Poppaea Sabina)。尼祿強行要求波佩亞同丈夫離婚,而史籍記載,尼祿竟然係同奧托(Otho)一齊「享用」波佩亞。大約公元58年,阿格里皮娜為重奪對尼祿既控制,竟然做出一件令人震驚既事情:佢竟然以一貫手法既甜言蜜語、邪派既外表同親吻勾引自己個仔尼祿,然後仲同佢上床!不過一切都係徒勞無功。波佩亞成功說服尼祿,話阿格里皮娜密謀推翻佢,仲不斷煽動佢殺親生老母既念頭。響59年,尼祿響波佩亞既唆使下,決心剷除自己老母,佢知道落毒冇用,因為對方都係用毒高手,於是佢設計引阿格里皮娜到拿坡里。佢用左兩次唔同既機關:一次係自動塌陷既屋頂,另一次係自爆遊船,兩次阿格里皮娜都成功避過一劫。最後尼祿派出刺客,將自己老母暗殺。


波佩亞(Poppaea Sabina)頭像及全身像

阿格里皮娜葬禮當日,有說指尼祿曾經望住屍體慨嘆:「我唔知原來自己竟然有個咁美麗既母親」。而相傳阿格里皮娜遇刺的當晚,據說尼祿見到自己老母既鬼魂出現響面前,嚇到神不守舍。之後佢多次換行宮,每當佢搬到一個新行宮,阿格里皮娜既鬼魂都會跟住佢,而每當類似事發生,佢就會搬去第度。終其一生,尼祿都唔敢接近阿格里皮娜既墓塚,而最終佢亦都會變成神經衰弱。

悲劇主角
雖然阿格里皮娜成功將兒子尼祿推上帝位,但係尼祿心裡面另有盤算,佢既志向一直都唔係做皇帝,而係向藝術家方向發展。話說尼祿係一個自戀、自大、自憐、奔放既人,經常幻想自己係偉大既詩人同知名演員,經常幻想自己係希臘悲劇入面既主角。

據古籍所著,尼祿極度自戀,表演慾極大,經常響賽車場(chariot racing)、競技場(amphitheater)出現,但佢真正最熱愛既係希臘話劇同詩詞。尼祿經常作演員親自上場表演,彈琴、唱歌(佢好著緊自己把聲)、戴上面譜演希臘話劇。當時演員同歌手係被人睇唔起,當時受尊重既係發表公眾演說既演說家、律師同哲學家,而皇帝親自落場唱歌演戲,被認為係對「奧古斯都」呢個身份同名銜既褻瀆,但尼祿理想至大,一於少理閒言閒語。眾多話劇之中,尼祿獨愛古希臘悲劇,呢位羅馬皇帝入戲太深,甚至將佢既人生視作一齣戲劇,而自己就係悲劇主角,呢個最終會成就一個暴君殞落的自我實現預言。

公元64年,羅馬發生一場慘絕人寰既大火災(The Great Fire of Rome)。據部分當時著書的史學者所述,呢場火有可能係尼祿命人所放,尼祿派出衛兵扮成鬧事打鬥的醉漢,響城內多處地方放火。羅馬街道狹窄,充滿左高聳既住宅大廈,火勢迅速蔓延,燒左六日六夜,整個羅馬幾乎被夷為平地。據史籍所載,當羅馬燃燒之際,尼祿走上皇宮既屋頂,望向熊熊燃燒既大火,一邊撥動琴弦,一邊唱起《特洛伊的殞落》(the Fall of Troy)。有人認為尼祿放火燒城,係為左完滿佢既角色;將燃燒既羅馬作為大舞臺佈景,將羅馬同特洛伊相比(當時傳說羅馬係由特洛伊逃出既難民所建立,所以尼祿挑選特洛伊的殞落應該並非偶然巧合),哀悼偉大之城既沒落。


尼祿一邊睇住羅馬燃成灰燼,一邊彈奏樂曲,唱起希臘歌劇《特洛伊的殞落》,圖出自1951年電影《暴君焚城錄》(Quo vadis)

火災後,尼祿清出一大片土地,開建自己既新皇宮——金殿(Domus Aurea)。亦都否決元老院遷都拿坡里(Neapolis)既提議,並按照自己既意願重建羅馬。為籌措龐大經費,尼祿向行省開刀,加重賦稅、橫徵暴斂,甚至逼富豪自殺,以獲取巨額財富既繼承權。災後,尼祿亦都將火災責任推比羅馬城內一群邊緣團體,嫁禍基督教徒並大舉逼害;而據傳統講法,使徒保羅(Paul the Apostle)同彼得亦都係響尼祿年間殉道。

天下圍攻
公元59年,尼祿拋棄左佢正印皇后奧緹維亞(Claudia Octavia),並以子虛烏有既罪名將佢放逐。由於奧緹維亞深受人民歡迎,當羅馬城內既人民知道佢被殺後,表現得非常憤怒,甚至高舉佢既雕像上街暴動;而尼祿亂倫同弒母既暴行亦都再次被提起,所有矛頭直指呢位暴君。尼祿假裝召回奧緹維亞平息眾怒,然而62年,奧緹維亞慘被尼祿派人殺死,死後,佢個頭仲比人斬左落黎,送到波佩亞(Poppaea Sabina)果度。呢一切背後主使既唔係第個,正正就係波佩亞。奧緹維亞被剷除後,波佩亞成為皇后。響尼祿執政期間,佢親自到希臘參加大量的表演、奧林匹克競技等,但佢亦都同時響希臘橫徵暴斂,將經濟嚴重破壞。但佢一於少理,甚至遠赴非洲南蘇丹地區尋找尼羅河既源頭。響帝國境內,不滿既聲音正漸漸高漲,終於響公元65-68年到達高潮。

正所謂剃人頭者,人亦剃其頭;公元65年,尼祿多行不義既皇后波佩亞大肚期間因為不慎惹火尼祿,結果被對方拳打腳踢致死,一屍兩命。後來尼祿經常都會見到波佩亞同佢老母既鬼魂纏住佢。後來,尼祿後悔自己既做法,為波佩亞舉辦盛大既國葬儀式,呢場喪禮竟然耗用左相當於十年進口量既阿拉伯香料。尼祿既窮奢極侈終於引火自焚,公元65年,元老院陰謀叛變敗露,所有反對尼祿既元老被悉數屠殺,但麻煩接踵而來。公元66年,帝國東方爆發羅馬歷史上最嚴重既行省叛變:猶太起義(Great Revolt of Judea),隱居希臘既退休將領維斯帕先(Vespasian)同提圖斯(Titus)受命出山,領軍到猶大地平亂(呢兩位將後來都會成為羅馬皇帝)。猶太起義未平,羅馬帝國四處都係新火頭,公元68年,西班牙行省同高盧行省又發生兵變。尼祿呼風喚雨既日子,已經屈指可數。


第一次猶太戰爭(Great Revolt of Judea, 公元66-70年)

眾叛親離
公元68年,當羅馬西歐駐軍發生兵變後,親衛隊好快就離棄左尼祿。元老院乘機決議將尼祿宣佈為「國家公敵」,亦都係羅馬帝國史上第一次有皇帝被宣判為國家公敵。尼祿先逃離羅馬,後來又返到羅馬。當佢想搵一個角鬥士幫佢結束生命,發現所有人都已經離棄左佢;冇人幫佢,亦都冇人殺佢。尼祿於是講左一句:「唔通我唔止冇朋友,就連敵人都冇?」(Latin: Ergo ego nec amicum habeo, nec inimicum?, Suetonius)結果佢嘗試投河自盡,但係又失敗,結果佢仍然搵到一位朋響城外既莊園,藏身響果度。當宣佈元老院判決既士兵坐住馬車黎敲門時候,尼祿準備自殺,但佢落唔到手,結果要佢朋友幫佢完成。史籍記載,尼祿死時既最後一句遺言係:「這世界痛失了一位偉大既藝術天才!」(Qualis artifex pereo!, Suetonius)

公元68年,尼祿自殺身亡,死時30歲9個月,在位13年。

死後,元老院通過法令對尼祿進行記憶抹消(Damnatio memoriae)處理,清除一切關於佢既雕像同記念碑,直到後期法令被推翻,所以而家先仲有尼祿既雕像留低。

響卡利古拉同尼祿既經歷入面,我地睇到暴君係如何煉成

阿格里皮娜勾引對象:哥哥卡利古拉、叔叔克勞狄、兒子尼祿、妹夫Lepidus、尼祿帝師露西亞.西尼嘉、年輕貴族、親衛隊隊長,未能盡錄
阿格里皮娜殺害對象:兩任老公(其中一位羅馬皇帝)、對尼祿有威脅既對手數目不詳
尼祿殺害對象:母親、兩任妻子、先帝遺孤不列顛尼烏斯、元老數目不詳、羅馬富翁數目不詳

響此後兩集的內容中,我地將會見到尼祿既超級工程如何反映佢極度的自戀同對希臘文化/歷史既著迷

金殿(Domus Aurea, 公元64-68年)
公元64年羅馬城火災後尼祿重既計劃既核心,面積達到甚至超過1平方公里的巨型宮殿,內裡設備極盡奢華

尼祿巨像(Colossus of Nero, 公元64-68年)
比肩七大奇跡的青銅巨像,顯示尼祿強烈既表演慾、希望世人注意佢既作品,亦係仿古希臘羅德島巨像而建

希臘科林斯運河(Corinthian Canal, 公元67-68年)
尼祿所進行過最大規模既基建工程,並無完成,尼祿死時工程正進行得如火如荼。羅馬帝國滅亡後,一直冇人敢認真嘗試呢個工程挑戰,直到公元1881年先再次動工興建,1893年完成,走線同尼祿所建的運行一模一樣。