恐懼鳥本書被投訴要包膠之後,有66個團體再次狙擊,聯署要禁售恐懼鳥嘅書

聲明: 反對「恐懼鳥」兩書仍可公開銷售(聯署內容及名單)

聯署主要理據為
//那本書只是教人自殺,但現在這兩本書卻教人以變態的手段殺人,而其殺人時的變態思想更是匪夷所思!例如,書中有一段是教導讀者如何以烹煮方式殺害女童,在這段中,同時也繪形繪聲地教導讀者如何用一些技巧,使自己可盡量享受觀看被害者的痛苦與掙扎,並從中得到快感。

當中所傳遞意識的卑劣,豈是一本教人自殺的書所能及?這又豈是適合任何人看的書?包了膠又如何?對18歲以上的人就不會有任何負面影響嗎?//

我真係想知有殺人情節就等同教殺人依個所謂嘅理據有咩證據可言?又有咩標準可言?如果依個理據真係可以成立嘅,歷史書上亦都不能含有酷刑情節,宮刑、劓刑、凌遲等等都係非常殘忍,小紅帽都有食小孩情節,係咪要禁?電影就更加比書本更繪形繪聲,豈不是所有電影都要禁止血腥情節?香港只可以播天線得得B咩!

而最諷刺嘅係66個組織當中有唔少基督教同天主教嘅團體與學校,我向該面書提出聖經中都有唔少暴力、血腥、色情嘅情節,點知面書管理竟然胡亂砌詞話聖經已經對此等不當行為作出譴責

嘩,真係未見過喎,咁我就救教叫佢列出邊度譴責喇

佢就答我個組織唔係宗教組織,叫我要投訴就自己投訴,喂你想恰人唔識就求其作個答案都夠膽死,不過好多人都有常識架。至於我會唔會真係要投訴要禁聖經?唔會囉,我一直都支持出版自由嘅,不過我見聯署入面嘅組織唔投訴自己本野(聖經)又走去投訴恐懼鳥,根本就係用雙重標準嚟打壓異己。

李波事件同網絡23條等已經見到有人不斷要打壓香港言論同出版自由,我真係唔想見到香港會變成一個禁言嘅地方。

再講,作為家長/老師係咪要迴避同啲小朋友講依個世界係有血腥、暴力、變態嘅事呢?咁家長/老師唔教啲小朋友話佢地知有拐子佬、金魚佬依啲變態野,佢地點知依個世界有幾危險,除非你想關住佢地一世。

圖片來自旺角樂文書店選書
https://www.facebook.com/LuckWinBookStore/photos/a.213554261993028.67622.118481291500326/1395873950427714/?type=3&theater