返屋企時見到電視開梗,播梗TVB,個政府廣告話「中華民族嘅傳統美德係孝順長輩,我地要傳承落去」乜乜乜喔。孝順係一個好難譯嘅字,因為唔係個個文化圈有呢個概念:點解你多生存咗幾十年,你就Deserve多啲尊敬呢?乜一個人有幾值得尊敬唔係自己掙返嚟,唔使智慧增長,生存得耐就得㗎啦?咁爽皮嘅?

咁孝順其實有乜社會功能呢。我讀過一本幾有趣嘅金融書,叫《沒有中國模式》,入面有個論點就係講梗中華文明「孝順」嘅源起:中華文化以家族為本,老豆幫爺爺養老,仔幫老豆養老,孫幫仔養老,如此類推,親子關係其實係隱形嘅金融契約。但呢啲隱形契約冇法律約束力,咁點算?泛道德化佢囉。你唔養老豆,你道德有問題,你不孝。咁都唔夠力,於是應對父母報嘅恩唔止金錢回報,仲上升到聽話嘅地步,將呢種毫無道理嘅服從由細就烙入小朋友嘅心中。

直接啲講,我覺得孝順真係一個好ON9嘅概念。與其拍呢啲廣告,不如宣揚「多啲管教長輩」呢個重要但被忽視嘅概念仲好。案例都聽過唔少,有啲老海鮮真係好失禮,累人累物,負責任嘅人記得唔好對佢地視而不見,由得佢地變老害。