內米湖巨船Nemi Ship、以及卡利古拉巨艦Caligula’s giant ship/上 (公元37-41年)

羅馬巨艦
講起古代既巨艦,或者有人會諗到西班牙既無敵艦隊(Spanish Armada),又或者有人會諗到鄭和下西洋所用既寶船(Treasure Ship),但似乎好少人會即刻諗到羅馬。但實際上,羅馬造船技術吸收左地中海所有文明體系既精華,包括希臘人同迦太基既技術,響同時代既世界可謂無人能匹敵,只係名聲冇咁響。記得上季講到克勞狄(Claudius)既港口城(Portus)時,我提到既運糧船,古代作者提及運糧船有分唔同尺碼,當中最大號既運糧船排水量過千噸,而一直以來歷史學家都唔信係真。因為過千噸既商船響歐洲要到大航海時代之後先至普及,比呢個早成15個世紀既羅馬人點可能會做到?

又或者係因為歷史學家對羅馬造船技術既無知,文獻既證據一直被人忽略,直到卡利古拉(Caligula)所建既多艘巨船重見天日,考古學家先至驚覺原來古羅馬既造船技術遠比初期史學家所想像既更先進。唔單止千噸運糧船係完全可行,而且羅馬人部分技術竟然要到近代先至被重新發明。而呢一切,就從內米湖既巨艦傳說開始。

重見天日
話說響卡利古拉在位期間(1世紀中葉),呢位暴君響距離首都羅馬正東南面26公里處既內米湖(Lake Nemi)修建左兩艘巨船,其中一艘巨船上建造左一座月亮女神戴安娜既神殿,另一艘巨船係卡利古拉既豪華遊船。《十二帝王傳》作者Suetonius曾經提及卡利古拉建造奢華水上宮殿既事跡。卡利古拉下令建造既遊船除左大之外,船上更有恆溫設備、精美的馬賽克地板畫、大理石及青銅雕像、銅瓦片屋頂、甚至冷暖水浴池。雖然係響船上,但內裡裝潢陳設同真正既皇宮裡面的設備係一模一樣。卡利古拉被刺殺後,兩艘內米湖船(Nemi ships)被沉入湖底,不經不覺就渡過左兩千年既歲月。然而自從中世紀時代,當地漁民中間就不斷傳出湖底有巨船既消息,甚至有人曾經嘗試撈取文物出售圖利。直到十九世紀初,對遺址進行學術研究既呼聲漸高,到十九世紀末,詳細測繪發現湖底下有兩艘而非一艘巨船的遺址,而二十世紀初,意大利政府重新清空一條古羅馬時的排水隧道,加上水泵,嘗試將湖水排乾令文物重見天日。然而當1929-1931年間,湖水降到內米湖巨船破水而出既一刻,所有人都被眼前所見的嚇左一大跳。




1930年代出土的兩艘內米湖巨船

內米湖巨船出土時的甲板以及上面的黃銅飾物

手臂狀黃銅飾物(位於博物館內)


水上行宮屋頂作瓦片用途的銅片


內米湖船上的黃銅獸首像:精雕細琢的工藝品

黃銅獸首像原本的位置

內米湖船(Nemi ship)上的大理石柱

二十世紀初,考古學家發現內米湖床兩艘羅馬時代巨船既遺址。雖然經過左兩千年既歲月,但兩艘船外形保存仍尚算完好。當中第一艘船殘長達70米,闊20米;第二艘船殘長73米,闊24米;兩艘巨船排水量均超過1000噸的級別。相比之下,16世紀末西班牙無敵艦隊最大的聖馬丁諾號全長約55米,闊約12米,排水量906噸。而近代保存最完整的古船,瑞典王國響1627年建成的海軍旗艦華沙號全長69米,闊11.7米,排水量1,210噸。

驚人發現
內米湖巨艦既發現震驚左考古學界,因為在此之前,歷史學家對羅馬人是否有能力建造千噸以上的巨艦抱懷疑態度,佢地認為建造同類艦隻既技術過於超前,而古代作家所寫的船泊大小屬於「詩意的誇張」。內米湖船為羅馬帝國最高水平的造船技術提供極其有用的資料,唔單止證明左羅馬人有能力建造巨船,而且從船的遺址出土好多意料之外的發明,顯示出羅馬人極度超前的技術水平,關於呢方面既資料,下篇會提及。






卡利古拉的內米湖豪華遊船以及水上行宮復完圖:極盡奢華

造船技術
除左船體體積巨大之外,考古學家對內米湖兩艘巨船的研究更帶黎彌足珍貴的第一手考古資料。考古學家發現船上確實有巨大既宮殿結構:大理石柱、馬賽克地板畫、雕塑等藝術品、當中黃銅獅首槳環同狼首槳環雕刻極其精美,時至今日仍然栩栩如生。考古學家發現,兩艘船以古代地中海流行的「先船殼,後龍骨」(Hull first)的方式建造,船殼使用預製件以入榫方式拼合,再以鐵製的圓柱同釘固定。有趣既係,船殼預製件上竟然採用木板包鉛的結構,呢種係海船所用既標準構件,外層的三層鉛製蒙皮防止海中生物侵蝕木製船體,但淡水既內陸湖就唔需要呢個設計。因此,考古學家相信內米湖船並非特別設計,而係利用當時建造巨型海船的標準化流水線黎組裝,只係甲板上既宮殿按訂製者喜好加建水上行宮同別墅。


船殼建造方法

船身上發現的鐵釘

內米湖豪華遊船及月亮女神廟巨船復完圖