唔知點解好多人打個「唔」字都好鍾意幫佢飛邊。
  
有人話依個係5P字,但我發現會用吾字嘅人除左班MK,好多廿幾三十嘅人都會用埋一份。無論你喺論壇、FB、IG都好,留言會用個「吾」字嘅人總有一個喺附近,甚至會多人過打唔字。點解吾字咁受歡迎?依個係一個一直令我好好奇嘅問題。
  
「吾」依個字代表「我」,由古代就開始用,好似「吾日三省吾身」依句曾子金句就已經有吾字出現。不過吾始終係一個古字,一早已經比我字取代左,就好似莎士比亞作品出現嘅THOU就係YOU字嘅前身之一一樣,而家基本上唔會有人再用喺日常生活。雖然而家網上啲人用返個吾字,但佢地扭曲左吾字本意,只係用嚟代替同音嘅唔字。
  
點解要咁做呢?我見有人話方便。唔同吾只係多個口字邊,用電話打其實唔比吾字更快出現(當然我知IPHONE係你用嘅字愈多排愈前,但咁唔係更應該用正字咩?),用速成大家都係打頭尾碼第一版就有,我唔明吾字方便左幾多。何況如果你覺得小個部首小啲筆劃就係方便的話,你不如直接用殘體字啦,個門字殘體方便到暈啊喂。另外會有人講英文字都有簡寫OMG之類,但人地簡化嘅係一句句子或者一個名詞,好似中文蛋沙律牛肉三文治你會叫佢做蛋牛治咁,同你用第二個同音字代替正字一啲關係都冇。
  
除左吾字,仲有「系甘牙」三大天王,我會將佢地由典型MK字當中分拆開。因為好多MK字係加草花頭(好似莪咁),正常人唔會用,只有MK為左增加所謂嘅獨特性而用。但吾系甘牙嘅通用性比起好多典型MK字高,好多人留言果陣都會用到依幾隻字,亦唔覺得咁樣有乜問題。冇錯佢地讀落係一樣音,但字唔同就有唔同嘅意思,依個就係中文吸引嘅地方。點解你返學返工要寫字就識寫唔,但返到屋企打字就要用吾呢?除非你有特別意思表達或者想模仿MK口氣,如果唔係打字果陣比返個部首啲字啦好嘛?幾廿歲要靠交通工具唔係問題,但連字都用錯的話就真係過份啲囉。