早前係佐敦嘅佳佳甜品同係荃灣嘅祥興記生煎飽獲得米芝蓮青睞而名氣大增,不幸地兩間鋪嘅業主見人有景就想同人分身家,大幅加租攪到人地要走。當時有報導形容米芝蓮成為「死亡之吻」

〈米芝蓮「死亡之吻」 荃灣祥興記生煎包被加租逼〉

甚至有市民早係米芝蓮推出街頭小食推介嘅時候,認為此舉係對小店捧殺。當然,對於業主嘅行為我都為嗰啲小店覺得不值,但係當時我對於米芝蓮會惹起業主加租而害死小店依個論點係反對嘅。

我嗰陣係自己面書講過我嘅睇法,依啲鋪頭得到人認同,出咗名嘅係依啲鋪頭而唔係業主個鋪位,出咗名嘅可謂有麇自然香(不過本人係食味道唔係食名氣嘅), 間鋪頭可以般去第度再嚟過。間「名店」走咗,我就唔睇好業主個鋪位仲可以維持咁旺,俾佢收啲咁嘅租金。

到最近見到一單新聞,可以話係有少許印證到我依個論點:
〈 迫走添好運 業主蝕逾850萬賣旺角舖〉

持貨4年蝕653.2萬元,貶值16.3%,連使費料蝕約856萬元。

此舖原先為米芝蓮星級食肆「添好運點心專門店」旺角店,老闆培哥在2009年於廣華街開設添好運,門外經常排滿長長人龍,所以吸引買家在2012年購入該舖收租。不過新買家購入後,將添好運原先月租4.2萬元,大幅狂加至11萬元,逼走添好運

廣華街個位一向都唔係咩旺嘅地方,係「添好運」開咗係度先帶旺條街,依位天才投資者(/投機者)就以為係條街旺咗走去接火棒,結果劇情就好似我論點所講,高租金唔能夠維持,最後仲要損手收場,咁當然800萬對佢可能係散紙,有人去次日本都洗成球,去多幾次咪8球囉。

不過係度真係希望啲業主可以明白,租客同業主嘅關係可以係互利互惠,人地賺到錢,業主加下人租,人地都未必想般,因為間鋪已經搵到一班熟客,需知要搵班新客嘅成本會比留住舊客嘅成本會大好多,租客可能都想一動不如一靜,但係如果業主要獅子開大口,咁就真係要睇下邊個會蝕底。

至於般咗嘅 「添好運」、「佳佳」、「祥興記」依家又點? 「添好運」、「佳佳」 仲係其門如市,好似「佳佳」咁係原區安置,可以新舊客都食晒,真係要多謝個業主舍身成仁幫佢上報宣傳,上個月我去幫襯要排晒隊,仲要等整人先入得去。而「祥興記」就開咗兩間分店,一間尖沙咀變咗主打外賣,另一間係將軍澳(我未去過),尖咀個場無荃灣咁旺,老實講,食物質素比係荃灣嗰陣差咗,亦都多咗啲係荃灣無嘅高質強國遊客。

得到米芝蓮推介嘅鋪頭,其實我反倒擔心嘅係其他問題,就係食物/服務質素可唔可以維持。曾經我試過一間小店覺得唔錯,咁我就不斷介紹俾朋友,有日我去幫襯嗰陣,個老細同我講:「喂,唔好再介紹人嚟喇,太多人我地啲質素保持唔到架。」

依個真係好多鋪頭旺咗之後會出發嘅現象,就係質素走樣。有良心嘅鋪頭會盡力保持質素,不過我以前睇過蔡欄個訪問,講佢攪過檔粉麵嘅物體,但係啲 partner 見客多就會加多兩碗水落啲湯度,務求做多幾個客,依下野就真係要店主有堅持先得。

而另一個就係服務質素問題,客大多啲員工係會黑面,即係服務質素下降。咁對住客人太多嘅情況,有店主會開分店,咁要分店都保持到質素,就的確要管理得而。有啲人就只係想專心攪間小店,唔係想發大嚟攪,咁會點做呢?有人會限制人數,又有人會選擇加價,不過依兩個做法都會令我依個窮鬼少咗選擇。(當然亦有人為咗食名氣而唔介意黑面嘅)

其實我認為受到美食推介可以係對小店生存嘅一個助力,對於香港周圍都係千篇一律嘅連鎖店未必係一件壞事,不過出咗名嘅小店要保持到質素先可以繼續得人心,咪當香港人都係傻嘅,而出咗名嘅鋪頭可以唔加咁多價就好喇!