話說琴日同男朋友拍拖去街街,一路行一路傾下無聊野,係旺角街頭上,我哋都係咁回憶起「記唔記得以前鳩嗚團行到呢度,d珠寶店員工驚到要落閘,哈哈哈!」伴隨著歡笑聲我們走過旺角。

在我毫不經意之下,我突然感覺到一個既陌生又熟悉的前度身影,在我面前輕輕走過,但一瞬間,卻被他女朋友扯走了。

係果一刻,我好似咩都聽唔到,我男朋友好似問緊我野,但我都完全聽唔入耳,而我個刻係目定口呆、手心冒汗、驚恐在心頭。

回過神來,我同男朋友講:「我啱啱撞到人呀。」

「吓?你撞到咩人?」

「我唔知呀!」

「下?咩唔知呀?(笑喊)」

「我撞到個朋友呀。」

「咩朋友?」

我有點支晤以對「我以前個男朋友呀,好驚呀,前面紅色衫嗰個,好驚呀!」

當時我男朋友卻係非常淡定……

我緊緊拖著男朋友的手,幸好前度同佢條女最後都行走左,我們都要各走前路。

我定過神後,先諗起原來同前度已經分開左一年多啲了,雖然當日喊到要生要死,覺得自己輸左全世界,仲要輸俾一個朋友們都覺得唔應該輸嘅女仔,但而家諗番真係覺得自己傻到痴線(笑喊)。

一場戀愛,都會讓你上一課:能走埋一起,能維持感情,有共同興趣係好重要(就是因為我和前度之間沒有共同興趣可互相交接,先令第三者有機可乘),而且真係可以傾到偈,可以同佢分擔好多野;而佢就可以幫我解決困難,同我一齊面對人生嘅高低起跌。用心了解對方,兩個人嘅心先係真正嘅連繫著,先算係拍拖,而唔係為拍而拍純粹想有一個人可以成日哄我笑、陪係我身邊咁簡單。我甚至到分手果一刻先發覺自己根本唔了解佢,真係好無奈。

我今日嘅我,完全已經唔係佢喜歡嘅我,因為我可以真真正正做回自己,佢見到我著緊身牛仔裙和小背心,佢一定好反感,因為同佢一齊嘅時候,我裙子短小小,都要逼我番屋企換衫……

那時覺得自己失去什麼,但如果我當初沒有成全佢地,我今天所擁有嘅都會失去,唔會遇到現在疼愛我萬分,懂得怎樣待我好嘅人。

一起嘅時間有多長,從來對一段感情無重要嘅影響力,一個人要走,一個人要愛上別嘅人,我無法阻止,我當初毫無保留咁去挽回一段無愛嘅感情,其實都係徒勞無功,剩低嘅都只有自己去面對同「放下」。

如果係街度撞到前度,你又會點呢?