今日收到風,學民思潮好快宣佈解散。

如其話係解散,倒不如話係重組,清洗佢地眼中嘅瘀血,而D骨幹全部過曬去新黨。網上話有人用完即棄,小弟卻咁睇:組織裏政見不同,拆開倒係好事,無謂因爲羈絆、個人感情而嘔臭個朵,不過有趣嘅係組織裏嘅骨幹理念同野心差唔多。可憐果D當初加入學民嘅人好似俾人過左一棟,一來得唔到名氣,二來一直做緊原來同自己理念相反嘅野。

至於學民嘅支持者(利申:小弟唔係),就要睇下個新黨值唔值得你支持。

首先,新黨嘅focus唔再以學生關心社會爲主。當年學民以反國教起家係眾所周知嘅事,不過到左近依幾年,因爲將個focus放左係政改,無話唔得嘅,只係同成立目的唔再一樣,無錯學民係普教中、基本法教材都有出聲,但係始終無去唔到反國教果時嘅聲勢,所以其實果時就應該砍掉重練。好喇依家打正旗號轉目標,主打年輕人加入議會,依點又值唔值得支持呢?先唔講學生未夠秤投票選舉,有年輕人加入議會,係咪能夠令年輕人關心社會呢?又有幾多個年輕人真係相信議會呢?講到依度,小弟已經唔想講咩黎生「司馬昭之心,路人皆知」,想講嘅係,新黨仲係咪真係關心年輕人,定有人為參政而參政呢?

再黎就要講新政黨提出嘅五大政綱:「2047前途自決、將青年人對政策的想法帶入議會、須在大是大非問題上表態、設立有系統的議會內外抗爭,以及仿效台灣「零時政府」設立網上平台收集網民意見」。2047議題、十年公投,其實已經唔係咩新鮮野,已經有人話係九月選舉提出,方法走得更前,可以話陳黎二人係落後,情況就好比有議員建議左衝主席台好耐然後泛民過左十九幾耐先走去做。提出相同或類似政綱無問題,但係方法落後卻係敗筆,人地有必要去支持你嗎?留意返,小弟已經無話佢咩收割成果之類喇,單純用政綱對比政綱。

將青年人對政策嘅想法帶入議會同係大是大非問題上表態先係最搞笑嘅野。我想問下,黎生有幾代表到後生仔(註:黃之鋒同周庭未夠秤參選)?依度已經唔講佢個人能力,而係佢嘅政見、號召力。先唔講將青年人嘅想法帶入議會唔係得年輕人做到,黎生個朵係同輩當中有幾臭大家都知,佢仲夠膽將青年人對政策嘅想法帶入議會?就好似黃成智話自己係中間超人代表中間溫和派一樣咁嘔心,若有幸比佢選到,小弟能目測佢會偷換概念,美其名代表年青人,實際係騎劫。再者,唔好唔記得新版底係跨世代,即係話唔係淨係年青人。至於係大是大非問題上表態,真係仲好笑過王晶D戲——大是大非都唔表態,咁幾時先表態?你話係有爭議性議題定會表態都話會好D,依家抛個阿媽係女人嘅政綱出黎,你話支持唔支持好?所以呢,依篇文嘅題目係「比公民黨更令人作嘔的黎生黨」其實並沒有改錯。

唯一令我有D興趣嘅只有「零時政府」系統,不過搞唔搞得起係一個問題,係黎生手上變膠嘅野實在太多,到最後係睇黎生信唔信過,同佢能力如何,在此唔多作評論,畢竟我唔熟呢個年輕人。

總結黎講,依個比公民黨更令人作嘔嘅黎生黨,有嘅只係明星效應——政綱、班底、目標都未必係適合年輕人支持嘅政黨。老實講,小弟算好客氣,畢竟目標只有一個:反對庭妹組黨。該黨成立之時,小西毒會定期寫文抽插,且唔share唔like任何庭妹page內有關該政黨嘅post,直到庭妹退黨為止,立此存照。