香港,半年內,十九個學生自殺身亡。朋友補充,total係二十九個自殺,九個獲救,平均十日有一個學生自殺。

發生呢啲事,大人晌到做咩?教書嘅話唔關佢事,佢都係按學校同教育局指引;大學校長話唔知點解後生仔唔開心;自稱做教育嘅challenge點解其他人做到你做唔到?更多人話「我都係咁捱過嚟啦」,言下之意你捱唔過係你冇鬼用。

中國人有一個好奇怪嘅特點,就係習慣將自身唔好嘅經驗傳俾下一代,我唔記得柏楊係咪講過呢啲就係所謂「醬缸文化」(或理論、現象,something else),舉個例有個女仔啱啱結婚,覺得佢奶奶對佢冷淡,甚至差,到佢個仔結婚、佢做人哋奶奶啦,佢又會對個新抱冷淡。原來上一代嘅奶奶做人新抱時,都覺得自己奶奶好冷淡,但大多數人都會將呢種冷淡傳落去,結果每代人都唔開心。有啲女人叻啲,佢哋自己做新抱時覺得奶奶唔好,到自己做奶奶就會將以前嘅負面經驗當係自己嘅警惕,呢啲部婆媳關係就會好啲。

放返嚟學生自殺呢件事,好多人話「我以前都係咁捱過啦」、「以前環境仲差,我哋都係咁過」,當你咁講嘅時候,其實都係將自己唔好嘅經驗帶俾下一代,佢哋接收到嘅message係「以前咁差、而家都係咁差」,於是咪覺得冇希望囉。我明白有啲人係希望鼓勵啲後生仔,話俾佢哋聽「我捱得過你哋都得」,不過你哋可唔可以講多少少自己當年點捱、晌佢哋前引領啲後生仔,而唔係只單單show off你做得到呢?

過來人嘅身份,係用嚟作為「同行者」陪住有需要嘅人一齊行,或者行前少少作為引領,唔係企晌人哋面前show off自己好叻、指責人哋冇用。將指住別人嘅手鬆開,拖住佢哋嘅手一齊行,好嗎?