新任沙田區議員陳國強先生,令人最印象深刻表現,要數2012年,喺新界東立法會選舉論壇上,舌戰民建聯四眼仔,並大罵民建聯係EVIL PARTY;而今屆區議會選舉,佢更以無黨派身份爆大冷擊敗競逐連任嘅民建聯候選人,成為沙田區議員。

入正題,我希望陳議員出選超級區議會,原因並非假膠,亦非靠害!

1.打破泛民大黨壟斷:超區其中一個飽受批評原因,就係該組別被政黨壟斷競選權,無黨派人士爭取提名困難,變相只由政黨壟斷議席;

2.給予選民含淚以外選擇:上屆大家以非自己意願,含淚方式投出黎嘅民主黨同民協議員,尤其香港選舉史上最高票數議員-票王涂謹申,在任期間有何建樹?含淚投票既不能令議員感受選民意願,反之更會騎劫你意願為你做更多出賣你嘅事;

3.今屆有意參選超區議員泛民名單-街工梁耀忠、民主黨涂謹申、新同盟范國威;除左梁耀忠外,其餘兩位欲參選人士都飽受批評,尤其因反對民主黨政改議案而另起爐灶嘅范國威更被指今天的我打倒昨日的我;

而要參選超級區議會,須要至少15位區議員提名-今屆區議會有17名獨立民主派,再加上青年新政鄺醫生,一共18位。在拎提名上相信陳議員可向佢地招手。(投稿時陳國強已聲稱有8位區議員支持他參選)

至於點解我想陳議員參選?其實我間中都有留意陳議員動向,當上年陳國強表示會參選區議會,到最後爆大冷贏埋民建聯成為區議員,都令我喺佢身上睇到希望;

而陳國強明確表明反共立場、批評保皇派、批評泛民守舊作風、甚至乎正面看待香港人對獨立,自決前途等議題,亦都令我對其有正面評價;

而陳國強曾指,自己何德何能參選(超級區議會)?又云人生只反共反獨裁,咁立法會不就是一個同evil party決戰嘅最佳舞臺嗎?

與其要人繼續含淚投票甚至投白票,陳議員大可以嘗試打破政黨壟斷,繼區議會選舉後再創奇蹟,並給予厭倦泛民嘅反共選民,一個投票功能組別誘因?