早幾日有位網民貼咗將相,係梁天琦睇住手機、企晌垃圾筒旁邊食煙,張相一出竟然引起罵戰。我用「竟然」,係因為冇諗過一件咁小嘅事可以講足三四日。好多人話呢位網民貼張相出嚟,係想「打擊梁天琦嘅形象,等佢九月選唔到」,其實我唔係好明當中嘅關係。

選立法會議員,唔係睇工作能力、政見、政績嘅咩?就算候選人係食煙又點?佢唔係晌非吸煙區食、唔係開緊會食、唔係食到開唔到會就得啦,我睇唔出佢食煙同工作能力嘅關係。正如我請廚師煮飯,我著重嘅係廚師手藝、食物安全認識等等,至於佢食唔食煙呢樣我管唔到,除非佢晌工作間食。(嗯……不過咁,食得煙多又唔夠運動,可能會影響心肺功能架!到時衝唔切去主席台就麻煩啦)

嗰班人覺得「貼食煙相唔啱」,應該係base on一個概念,就係「食煙唔啱」,所以佢哋先會覺得「食煙會破壞形象」、「影響選情」。咁就大鑊啦!佢哋撐梁天琦,但梁天琦食煙喎!梁天琦做唔啱嘅事喎!我仲撐唔撐呀?於是佢哋唯有鬧貼相嘅網民,潛台詞其實係:「最衰係你貼張相,你唔貼咪冇人知囉!」冇人知唔係指「冇人知梁天琦食煙」,係「冇人知我支持食煙嘅人」。

晌我眼中,食唔食煙問題真係唔大,我聽過一個講法,讀哲學同社會學嘅人通常都係食煙嘅,因為扯煙嗰吓其實係吸多咗氧氣,另外食完煙個腦通常都有少少時間諗唔到嘢,對佢哋嚟講係一個令腦筋休息嘅時間。

當然我唔係話食煙對人冇影響,食煙對自己同身邊嘅人都好有殺傷力(戴戴頭盔封少少後門先),但講更大殺傷力嘅應該係酒,酒後亂性、打交、傷人、醉駕,其實係咪仲危險?