巴爾貝克(Baalbek)神殿群/上 (公元前15年-約公元60年)
遠古外星人飛船的著陸平臺?定係古羅馬文明登峰造極既技術結晶?

黎巴嫩,巴爾貝克(Baalbek),當敘利亞內戰正酣之際,接近黎敘邊境既小鎮巴爾貝克除了荒涼的地理環境同鄰國湧入既難民之外,好似就見唔到d咩值得一提既野。但係響中東局勢失控之前,呢度曾經係一個吸引左大量獵奇遊客目光既地方。如果大家有留意,《走過烽火大地》入面,Tony就坐響巴爾貝克神殿群前獨白講出黎巴嫩被戰火纏繞既歷史。響一個叫巴爾貝克既小鎮旁邊,聳立住六根近20米高既羅馬科林斯式立柱(Corinthian Columns),立柱非常粗壯,每根重達230噸,雖然經歷二千年風吹雨打仍然屹立不倒。更加令人吃驚既係建築群既基座竟然有重達800噸以上既石材,而距離地面30米高既構樑,竟然係用60至近100噸既石材預製件組成!單係望見已經夠令人嘆為觀止!


鳥瞰巴爾貝克(Baalbek)神殿建築群

氣勢恢宏的遺址,讓人難以相信係人手所造

建造工程延綿超過二百年,鴻篇巨制的遺址

單靠人力,到底點先可以將呢d咁重既石頭升到咁高?呢個疑問千年來一直令當地人困惑不已。事實上,近幾十年班New Age甚至曾經提出巴爾貝克既基座遠比距今2000年更古老。古代外星人論者認為,人類文明發展過程當中外星智慧生物曾經多次介入,甚至話人類種族都係由外星人基因工程既產物咁話。而巴爾貝克呢個巨大既神殿基座,佢地認為以當時人類既力量根本冇可能起得成,而且人類根本冇需要用咁重既石材建造基座,所以言之鑿鑿咁聲稱呢個基座係遠古造訪地球既外星人所建,目的係作為垂直起降式(VTVL)飛船既著陸平臺。根據佢地既講法,當外星人離開地球後既好多好多千年,人類為左記念呢班授予文明既天外來客所以就響佢地留低既著陸平臺/飛船發射場建造神殿,崇拜呢班來自外太空既「神明」咁話。


其中一件雕琢極精美柱頂橫樑構件(Entablature)的殘片,很難想像它曾經離地超過十層樓的高空

陰謀論講到呢度,其實講左咁多野,無非都係想帶出一個信息,就係「至今好多人唔信古人有能力起到呢d野,由此推測一定係有先進科技外星人起。」咁不如我地而家就睇下到底主流學術界點睇巴爾貝克木星廟,到底羅馬人又係點起出呢舊直到今日仍然嚇得死人既超級建築。

公元前1世紀建築奇跡

Baalbek,羅馬時代古名Heliopolis (Helios=太陽神,Polis=城市,所以Heliopolis解太陽之城)本身係一堆好大既宗教建築群,歷史亦都好長,早響羅馬以前已經有腓尼基人(Phoenicians)既邱壇(high place)同埋一座羅馬統治前修建既結構(可能係塞琉古希臘人既廟),當地中海東部落入羅馬統治後,希利波利斯作為一個羅馬人既殖民城市響前1世紀末開工修建,而奧古斯都親自參與規劃一個舉世矚目既超級工程。響一個東西方通商既重鎮建造一座如此龐大既建築群,其中一個意義當然係宣傳大羅馬帝國國威。於是前15年,希利波利斯神殿群當中第一期響動工興建;而整個建築群將耗時超過兩個世紀,逐步實現奧古斯都當初既宏圖(甚至可能超越)。而一切就從朱比特神廟(Temple of Jupiter)開始。


巴爾貝克(Baalbek)復完圖

羅馬人建造的巨大基座及其上的神殿(Lohmann and Kropp, 2011)

較早期的基座(希律王或希臘人所建)和羅馬人擴建的平臺基座(Lohmann and Kropp, 2011)

神殿群建築藍圖

剩餘的六根立柱同基座,近處既曾經係柱頂既構件(Entablature)

Fallen Entablature and the Six gigantic Corinthian Columns

水土流失

朱比特廟,顧名思義,係建黎崇拜羅馬神衹朱比特(Jupiter)既神廟。同好多羅馬建築一樣,朱比特廟係建響加高既平臺(platform)上面,呢個平臺製造出一個平整既山頂,可以比建築師盡情發揮既空間。當然,同耶路撒冷既聖殿山一樣,要將山丘平整出長方形平臺,就首先需要一座龐大而堅固既護土牆(retaining wall)。而因為對香柏木(cedar tree,黎巴嫩國旗上面果棵就係)既濫伐,黎巴嫩既巴爾貝克水土流失特別嚴重,所以呢個對建築師黎講唔可以話唔係一個巨大既挑戰。

千鈞巨岩

羅馬工程師首先響原有既平臺外圍再進行多一次擴建,以增加平臺面積。原來既平臺用既石材較細小,高度由1.11到1.29米不等,而長度就由2米到11米不等。雖然石材大小不一,但響平臺95米既總長度入面,平臺既高度誤差唔超過1厘米。原本既平臺(希律或希臘化時代所建)長闊為95X47.8米,而羅馬人既平臺就加到110X70米(超過一個足球場既大細)。而為左鞏固地基,羅馬工程師首先挖開表土,填入巨大既石材加固地基,呢d石材平均重量竟然達到350,000公斤。響地基之上,超巨大既單體式房角石(cornerstone)憑其重量穩定結構,呢d超巨型房角石總共有三塊,分別長19.1、19.3同19.6米;佢地高4.34米、闊3.65米,以石材密度推算重量超過左800噸!而響900米外既採石場另外有兩塊超過20米長、高同闊都超過4米既巨石,重量分別為1000同1240噸。由於石材被安置既地點離地面有近4米高,古代外星人論者認為就算用現代起重機,都需要花費好大既心血先移得郁佢地,所以呢d石頭既存在就正正係古代外星人論者認為呢個平臺結構係外星人傑作既「證據」。


巨型房角石所在位置

基座護土牆(retaining wall)的其中一塊巨岩,三塊均逾800噸重,建造方法同耶路撒冷聖殿山既奠基石異曲同工

基座護土牆的巨型石材(續)

採石場其中一塊千噸巨岩

基座巨岩的排列模式

鬼斧神功

咁到底呢d巨石,或者呢個平臺,到底係古羅馬技術既結晶,定係外星人用懸浮技術建造呢?其實只要往南邊望望黎巴嫩的死對頭以色列,答案就呼之欲出。響以色列耶路撒冷既聖殿山就有一塊600噸以上既房角石,而冇人會懷疑聖殿山到底係咪外星人建造。我地有足夠既文字同考古證據,呢塊600幾噸既巨石係由希律王手下既工匠開採並移動到位。600噸同800噸,所用既技術並無本質上既區別,只有規模上既區別,所以羅馬人絕對有能力、有技術、有時間去完成巴爾貝克呢個創舉。德國考古研究院(Deutsche Archäologische Institut, DAI)既Dr. Lohmann就清楚表示,巨大既平臺同三塊800噸既巨石,都係1世紀所建既科林斯式神殿(即係朱比特廟)既一部分。咁到底點樣黎動石塊?對於100噸以下既石材,維特魯威(Vitruvius)既建築十書就有講點樣移動呢d石材。其中有個方法:響長方柱體石材套入多個木製既轆入面,於是就可以當圓形黎轆!咁超大既又點搞?首先,圓形既木材會用黎放響底以減少磨擦力,跟住羅馬人巧妙咁使用滑輪(pully system)同槓桿(leverage)減少出力。使用六臺結合滑輪同槓桿既機器,只需144人就能夠將巨大石材移動到位。而且羅馬人亦都巧妙咁利用採石場較建築工地高既地利優勢,因為石材落山會釋放勢能(gravitational potential energy),反過來說,從低到高處就需要外力比能量佢,所以呢個亦都減少左移動巨石所需要既出力。到最後,呢個110X70米,通體用巨石構成既平臺就花左數十年既時間建成左。石與石之間甚至唔需要用灰泥膠合,經過二千年既歲月、地震仍然緊密排列,石縫中間打磨到達紙又或者剃刀片都插唔入,響冇激光測高儀既協助下達到極微誤差,甚至少於1cm,可見工程技術既高超!


維特魯威(Vitruvius)所述,移動中等大小石材的方法

不需外星技術移動巨型石材的方法

建成平臺,呢個只係開始。響平臺上面仲有一座105米長、68米闊、47.5米高既巨大神殿,佢既大細甚至挑戰「古代七大奇跡」之一既以弗所亞底米神殿(Temple of Artemis)。佢既立柱設計,甚至比亞底米神殿有過之而無不及,下part會講呢個。



巴爾貝克音樂節,留意人同建築物既大小比例