事緣係尋日熱血、普羅、復興會,開記者會宣布9月立法會選舉嘅參選事宜,當中最主要提及同矚目嘅係新界東,由人稱國師嘅陳雲考慮參選。 同一時間,亦都表示佢地嘅最終目標係「五區公投 全民制憲」五區嘅立法會議員當選後一段時間,辭職發動五區公投,由人民同政府立約,決定香港未來。

好多好多人包括我自己,第一刻聽完之後嘅感覺係反感。首先係反對重提五區公投,之後係所謂嘅收割同𠝹票論,再之後係講緊同其他本土組織嘅協調問題。

我嘗試逐點駁斥番自己。

第一個議題,亦都係最多人熱烈爭議嘅問題,係𠝹票同收割論。

新界東補選啱啱完結,有唔少人仍然沉浸喺六萬幾票嘅成績裏面。對於本土,呢次嘅成績雖然談唔上係勝利,但絕對係一枝強心針,對於各大本土組織嚟講,佢地睇到入選立法會嘅希望。對支持本土嘅市民嚟講,梁天琦已經成為左革命嘅一個象徵,大家都希望未來喺立法會見到更多嘅梁天琦為本土發聲等等。簡單嚟講,大家想keep住個勢再下一城。

但請大家唔好忘記,呢六萬票並唔係全部都係本土嘅支持者投出嚟,當中有一大部份係本土支持者落力拉票,向親戚朋友遊說,棄七保六,唔再含淚投票等等原因爭取返嚟。佢地可能完全唔了解梁天琦嘅政綱,唔清楚本民前嘅理念,甚至可能只係覺得梁天琦靚仔而投下呢一票。呢六萬票並唔係鐵票,所有選民都有自由意志決定自己嘅呢一票應該投俾邊個候選人。每一次嘅選舉都係新嘅情況同環境,冇人可以保證呢六萬票下一次會再投番落本土度,同一時間,亦都唔代表本土只能喺呢六萬票裏面「分餅」。黃毓民議員所講嘅拉闊光譜,在我理解就係呢個道理。

承上所言,所有選票都係自由意志。我地回想番新界東選舉,當我地每一日都力抗泛民嘅所謂𠝹票論,口口聲聲向佢地表示選票係屬於選民嘅時候,等同我地根本徹底唔承認𠝹票呢一個字眼!而到今日我地用番同樣字眼鬧番熱血公民等人嘅時候,我地又何嘗唔係成為幾日前我地口中恥笑嘅泛民選民?我地要俾選民知道嘅係,同一個本土裏面,我地有溫和本土,激進本土,甚至有心急本土嘅存在。選民要去了解各候選人嘅政綱,分析候選人背後嘅組織理念,從而選擇同自己理念最相近嘅候選人,投下佢手上嘅一票,令到佢地明白自己呢一票嘅價值。真正嘅本土思維,就係本土意識嘅覺醒,明白自己嘅公民責任。

收割論,有唔少人認為,國師陳雲出選新東,係收割本民前梁天琦喺新東嘅六萬多票成績。請問,梁天琦而家有表態話唔參選九月立法會選舉嗎?又或甚,有其他本土組織表明自己唔會同國師爭崩頭,鬼打鬼嗎?熱血公民有表明唔歡迎其他本土組織參選嗎?熱血公民冇將自己當作大佬嚟看待,真正當熱血公民係大佬嘅人,係一班向本土小組織靠攏,但對佢地冇信心嘅支持者。如果唔係,你點解會認為本民前贏唔到熱血公民?點解唔可能係本民前自己收割番自己嘅成果?

退一萬步,就算本民前真係因為各種理由唔參與今次選舉,亦都唔代表另一個打住本土旗號嘅候選人能夠完整取得所有選票。選民係有自由意志,佢地自然會決定邊一種本土佢地會支持,邊一種會唾棄,等同佢地唾棄泛民一樣。
另外亦有人認為熱血公民宣佈嘅時機唔好,甚至有人用「屍骨未寒」嚟形容呢次嘅政綱宣佈。適當嘅時機?難道熱血公民要等其他所有本土組織都宣佈哂先出嚟公佈先算適當嗎?到底係熱血公民真係當自己係大佬還是係你當左佢地係?就算熱血公民最後先出嚟公佈,到時都會有𠝹票收割等講法出現,因為喺大部份人眼中本土只有熱血公民,其他組織喺佢地眼中只係陪襯品。只要熱血公民決定出選,佢地嘅目的就係𠝹票收割。

然後係五區公投,上兩次嘅五區公投基本上都係以失敗告終,投票率偏低,俾唔到所謂嘅壓力俾到中央或者特區政府,喚起市民公民意識?啲人根本連白票都懶得落去投,咁到底憑乜野令到佢地咁有信心再將五區公投重新放入去議題上面?

答案係時間。

大家都知道每日都有新移民落嚟,每日大家身邊都充斥住你唔知佢奸定忠嘅大陸人。呢個種族清洗唔洗好耐,再過多十年就可以大換血,到時香港人會變為香港社會 少數聲音,所有議題同方案唔需要再考慮香港人嘅意見。咁時間唔夠同五區公投有咩關係呢?當我地基本上已經進入倒數階段,就唯有響有限嘅時間做最多嘅事。假設順利五區各有一席,響立法會宣揚政治理念一年左右之後,五區發動辭職公投。主要嘅唔係結果,而係公投嘅投票率!如果投票率高而本土派順利再度入番議會,等同給予中央壓力香港人對於本土嘅意識已經非常強,無法唔去正視,唔理係港獨,城邦自治,定係最易理解嘅基本法永續,中央政府都唔能夠再以一句「民意唔夠大」嚟作藉口。

睇到呢度,相信你,包括我自己,都覺得係匪夷所思。先唔講本土可唔可以返入去,淨係講投票率,同埋9月立法會選舉本土派(呢度指嘅係唔包括本民前青政等組 織)可唔可以有5席都成問題嘅時候。五區公投實在係太遙遠太遙遠太遙遠。在我個人而言,我對五區公投嘅成效係完全唔樂觀。但嚟緊呢半年嘅本土文宣、本土議 題、本土意識等等,可能會帶嚟各種變化都唔定,拭目以待。

等同,初一前冇人估到梁天琦有六萬幾票。世事如棋,冇人估得到。

總結,對於九月嘅立法會選舉,對於本土以至整個香港,都會係一個血肉橫飛嘅大戰,舊政黨組織嘅新舊成員交替、被選民所唾棄組織嘅垂死掙扎,新移民喺香港殖 民嘅影響力,甚至係各式各樣嘅點票手段,都會帶俾每一個香港人不同嘅衝擊,重新思考自己住緊嘅呢個小漁港,已經成為一個浴血戰場。而自己,已經不知不覺捲 入呢場大戰之中。

圖片 : 熱血時報 live 影片截圖,記者招待會