話說筆者昨日睇100毛「新東補選 校際時事常識問答比賽」,睇到尾段5秒發言總結時聽到楊岳橋一句話「我哋(香港)band 1變band 3」(見link),當唐打個突,band 3就係差?band 3好失禮你?

筆者絕對相信楊岳橋並非刻意標榜「band 3=差」,屬無心之失,但此亦正正顯示「band 3=差」係楊岳橋係打從心底認同嘅價值觀,凡辨學者皆應以band 1學校為目標,band 1係典範band 3係垃圾,與早前香港怪獸家長指「band 2係垃圾筒,band 3係堆填區」無異,以一種競爭嘅視角看待校與校之間嘅關係。此亦難怪,楊認為學校要競爭中上游,就正如香港細路一樣,有謂「你不愛競爭,但競爭會找上你」,教育從來都係踏著血和屍體往傳統菁英之路往上爬之事,什麼德智體群美通通都是bullshit廢話,以學校品牌鞏固貴族身份才是重點,呢一切,呢種競爭至上嘅價值觀,對14歲已能坐上飛機到加拿大讀書、喺加拿大學位畢業,身處金字塔頂層嘅楊大狀嚟講,經已deep-rooted,自然不過。

band 3就係差?呀楊大狀你嘅同路人進步教師同盟有講過下。band 3學校唔係差,只係主要收band 3學生為主嘅學校。咁band 3學生就係差?「無可否認,Band 3 學生,大都學習動機較低,行為問題較多。但學生的問題,很多時都與社經地位、家庭背景有著密切的關係。有資深的前輩分享說:『其實世上並沒有問題學生,只有遇到問題而不懂處理的學生。』……不少Band 3學生,其實只是十多歲的青年,面對來自家庭的問題、或自身的問題等,未夠成熟,不懂處理,所以變得反叛,或失去人生目標,成為遇到問題的學生。」(引用自進步教師同盟文章)

band 3學校只係較有經驗及有較好資源配套照顧弱勢學生嘅學校,唔代表學校質素差,而且照顧弱勢,具有社會功能。如單單從競爭角度去衡量,成績普遍較差,較少人能經教育制度晉身中產之列,就否定band 3學校,將band 3學校睇成堆填區,不宜久留之地,作為候選人,實在令人不安。就好比,你會唔會話社會福利署係堆填區?唔會。但楊大狀偏偏係時刻強調照顧社會弱勢之列,全民退保,標準工時,支持同性婚姻(性小眾),高舉平等博愛,卻鄙視照顧弱勢學生嘅band 3學校,相當諷刺。

楊大狀望見滿目瘡痍,面目全非的香港,即時聯想到腦海中那受社會擠壓於底部,跨代貧窮之苦的band 3無間地獄,口裡套出一句「我哋(香港)由band 1變band 3」,可算是人之常情,卻暴露出自身一套離地菁英厭惡弱者之價值觀,即使披著關懷弱勢的外衣,運用廣受認同的口才作多少次澄清,也於事無補。

p.s. 筆者唔否定學校教育同社會階層化(social stratification)嘅關係,「讀band 3會否較窮」等問題非本文重點

100毛 新東補選 校際時事常識問答比賽 第三節 (11:10)
http://www.tvmost.com.hk/201602222108_video_mostnews_nte_by_election_03

溫志文 進步教師同盟成員 – Band 3就是差?
http://www.inmediahk.net/node/1035791