原本想228補選完左先寫,最終都係忍唔住手,因為事情發展得太快,再唔出手我怕後悔。

話說上個禮拜黎生話同緊之鋒、庭妹籌備緊新政黨,唔係話小弟馬後炮,由佢唔做發言人,到近黎再度活躍,就知佢想點,只係估唔到係自己組黨,仲要咁快,同埋庭妹都有份。

表一表態先,小弟其實一直覺得學民作為學生組織有限制,長遠係要變interest group,有議題先係埋一齊,其餘時間各有各做,所以樂見學民跳出框框。不過學民點發展我其實無咩興趣,亦無意攻擊乜生乜生或者阻佢地去選舉。攻擊佢地對我有咩著數先?真係唔怕佢地係庭妹身邊講我壞話?

小弟在意的就只有庭妹,我極之反對庭妹加入黎生之政黨。

首先,黎生信唔過。庭妹啊,妳睇下近來學民補選立場嘅尷尬?點解會搞成咁?街外人都知道你地內部政治光譜闊過西隧,你地表唔表態真係WFC。但係個黎生自己出黎解釋成件事有啲…政棍feel,有句成語叫圖窮匕現,唔係話佢龍門任搬,係成件事佢為左justify自己所做而犧牲左啲人,亦係口中嘅戰友。依啲人信得過咩?你當人地戰友,人地未必咁諗。

其次,無咁嘅必要。庭妹妳又未夠秤去選,基本上係幫緊人鋪路,為左幫戰友?點解佢要組政黨唔加入現有嘅?真係開拓年輕人選票,定明知泛民朵已臭,索性自己做大佬(我已經唔講佢利用妳嘅號召力呢啲陰謀論)?另外妳號召力咁大,大可以自己搞啲妳鍾意嘅野,無必要跟妳口中嘅戰友。

再者,要有獨立思考。已經講過好多次,庭妹妳嘅最佳位置唔係跟住黎、黃二人做發言人,妳睇下近呢兩個月個直播迴響幾大?只要妳有心,有啲野無佢地兩個做得更好。妳有冇認真諗過之鋒個十年計畫真係work?係咪真係妳想做嘅?定係無條件支持戰友?

你話我搞分化,話我我局外人唔知內部野,我都係咁講,再次呼籲、寄語、拜託、懇請、哀求、希望庭妹認認真真考慮離開學民、離開黃黎林三人,我唔期盼將來妳會係本土女神合照出現,只跪求妳淡出,唔理我唔緊要,為自己著想要緊,有心但方向錯只會徒勞無功。小弟唔是敵人,同黎生亦無私怨,我淨係想講啲對庭妹好嘅野。我甚至乎小弟願意由終極目標「要求庭妹淡出」,降低請求到淨係唔同黎生組黨,妳留係學民、去其他政黨、九月投黎生幫佢助選都唔介意,總之……最低最低限度唔好入黎生個黨。

最後講多次,黃生黎生組政黨我唔care,依啲司馬昭之心路人皆知嘅野只係時間問題,我又唔回投佢地;我只在意庭妹入唔入黨,在此再次用小弟微小嘅力量呼籲大家,幫手勸退庭妹,佢唔肯聽我講。

P.S. 自己微小,只可以做咁多,其他野真係靠庭妹佢自己,要懂得say no啊(痛心)!

仲有,我無痴線。