首先如果你係楊岳橋,請睇最後一段。

第二,我好想俾《主場》登此文,睇下佢地對楊岳橋有幾多信心,可惜佢地唔受投稿,只可以變飛機文,有心有辦法既人可以forward出去。

本來一場無乜睇頭嘅新界東立法會補選,因為年初一一場有本土民主前線參與既「魚蛋革命」而變成全港討論嘅選戰,各立場嘅投票理據已經喺網上熱論,在此不再詳述,而宜家最開心既當然係樂見民主派「鬼打鬼」既3號周浩鼎。

本人支持6號梁天琦,理由同大家求變既心態一樣,但我想多討論今次補選結果及後既發展。我唔會天真覺得梁天琦會贏,補選結果只有楊岳橋或周浩鼎贏,加上一個必然既場外結果,就係本土派必會因為今次投票繼續壯大,本土派會吸收愈來愈多泛民既票。

有人問,守唔住關鍵一席無得拉布本土派點計先?其實係本土派立場,有無得拉布都只係時間問題,反正泛民錫身唔參加,政府都係可以通過排程同建制票去通過議案。我地著眼嘅已經唔係今場補選又或者係今屆立會無得拉布,本土派嘅眼光絕對睇得更遠。所謂大局,大家定義都已經唔同。今次輸,下次就會係老泛民身上拎更多嘅票,直到可以取代老泛民同建制硬碰,所有咩野單議席單票制議會規則技術分析都已失效。

將來嘅票從何來?我絕非恐嚇老泛民政客們,簡單分析一下票源就會知道。現時票源分三類,一係建制鐵票無需討論;二係唔認同以武抗暴既道德衛士同未知道對手何等殘暴既港豬,三係勇武革命主義者,寧為玉碎不作瓦全。要注意,呢三大板塊大小會變,但因為大陸愈來愈赤化香港,三十年和理非抗爭已知係死路,哩個變化只會單向走向勇武,此其一。其二係係道德衛士中必定存在暴政被打心裡暗爽嘅人,下次佢入到票站投邊個無人知。其三支持泛民既人說穿都係機會主義者,今日公民黨最有機當然投7號,他日本土派壯大後,能夠透過犧牲去迫使政權讓步從而令佢地得益時,佢地就會離棄老泛民,又係肯定嘅事實。以上所講除非港共政權放棄高壓治港,否則都唔會改變本土派日益壯大之勢,更可惜嘅係,楊岳橋或周浩鼎當選,毫無疑問高壓會繼續,9月選戰,將會有更多本土派出黎取代老泛民。

最後係想對楊岳橋講,旺角事件發生後泛民紛紛割席,唯獨你背黨而行出文出面去幫旺角義士,如果你心入面唔係希望哩班年青人帶黎改變,你又點會出手?你背負黨同泛民議員期望可見壓力幾大,今次我地呼籲跟自己意願投票,希望你都可以做一次真我,入浴室赤條條問下自己點去改變香港,點去成就一個年青人,去做你唔能夠做既事,希望我無睇錯你。