筆者依稀記得小學嗰陣,校長早會講過個幾有趣嘅故仔。或者,當時换嚟嘅只係同學仔之間一陣喧嘩,幾聲輕笑,但今日回想起嚟,我認為仍然係值得我哋自己去深思内省嘅故事。

話說,公安係關口捉咗一批人(我好想用疑犯﹐不過大陸並冇「無罪判定」……被人捉住,就變咗真兇咁滯。望下桂民海,望下李波⋯⋯)入房審問。惟一肯定嘅係,犯人當中並無香港人。公安點樣肯定佢係真.香港人,並唔係假冒身份呢?公安頭就諗出一條橋:「你哋去叫啲人起身唱國歌!」

此話何解呀?

「嗱,剩係識得唱『冒著敵人的砲火!前進!前進!前進進!』嗰啲就係香港人嘞!」

香港人於中國,毋庸置疑為永遠屬於極具離心力嘅一群。何以今日爭相自認「中國人」嘅不再少數?

本土思潮冒起至今,少亦有三、四年之數。似乎大多數人經已站穩陣腳,揀好陣營。特別經歷過「遮打革命」後,對自己嘅身份、對香港嘅認同,亦似乎有個大概。但咁樣係咪代表著一切塵埃落定?唔再迷惘,究竟係已經理解清楚、自認理解清楚抑或僅僅心靈、情感上有所寄托、聯繫?

他日係一口廣式國語繼續「前進」、God Saves the Queen﹐定係「城邦會戰勝歸來」?

作為香港人,或可能係最後一代香港人。筆者相信就算要唱所謂國歌,都會剩係識「錢進!錢進!錢進進!」。

新年進步,恭喜發財。或者,冇乜好迷惘,畢竟人人都鐘意錢。

嘻!

後記:
筆者執筆之時,身在北土鬼國,時值新年。返到落嚟香港,先對初一旺角之事有個大概。睇見,本土民主前線,令唔少人再次陷入迷惘,再次反思抗爭前路,實在有所感觸。我哋香港人,絕對唔能夠再迷信於同一套抗爭方式、套路,必須時刻反省思考。畢竟,我哋呢代,正正係嘗試緊前人未曾做過嘅事;我哋呢代,亦唔再係紙醉金迷嘅世界中得到滿足嘅一代。