各位香港市民、各位報界朋友:

童年破滅 校園沉淪 避秦無路 惟有抗秦
──港語學響應學民思潮、普教中學生關注組一六年二月十五日行動宣言

中共最近真係欺人太甚!習近平梗係睇得《尋秦記》多,學贏政誅殺長信侯嫪毐、文信侯呂不韋咁肅清咗周永康、薄熙來、令計劃之後,以為自己係秦始皇託世,野心染指百越,將香港特區變成佢大秦帝國治下另一個郡縣!今次所謂「更新」小一至中六「中國語文教育學習領域課程」,其實係教育局局長吳克儉呢隻狗奴才揣摸上意、奉承天威,迎合北面「依法治國」主旋律,用古時法家思想偷換本港法治觀念,一味吹捧佢哋嗰套小圈子圍威喂出嚟嘅《秦律》至高無上,恫嚇你班「黔首」夾住尾巴遵守;而且隻字不提「公義」、「人權」,顯然係妄想下一代腦筍都未生埋就扼殺佢哋對公平競爭、有尊嚴咁生存嘅寄望,荼毒本地莘莘學子!

至於普通話學習、簡化字教育,根本係「書同文」統一六國文字嘅加強版!唔少學者已經攞出最嚴謹嘅研究、最確鑿嘅證據嚟證明「普通話教中文」成效不彰,連教育局自己亦直認「以普通話學習的學生的中文能力,與以廣東話學習的學生並無分別,甚或表現更差」不諱--咁點解仲要倒行逆施,一下子倒退二千二百幾年返秦朝呢?

李波、桂民海佢哋入咗虎狼之國出唔返嚟,戰國時代縱橫家蘇秦一早預言過。七百萬香港人又係咪樂見成個香港同秦國融合咗,有入冇出?港語學願為香港人嘅語言、文化、自由同尊嚴,同暴秦及其爪牙抗爭到底!港雖三戶,亡秦必港!《推背圖》有云「吳楚依然有帝王」、「不信奇才產吳越」,唔到你唔信。勝利一定屬於香港人!

講返今日--由於吳克儉報警拘捕記者、打壓新聞自由,早有前科;我哋唔知今次吳克儉做得出乜嘢,亦唔知香港警方又做得出乜嘢;所以我哋今日嚟到呢度,保護學生表達佢哋嘅訴求--希望各位市民同我哋同心協力,一齊守護香港未來。多謝大家!