有人問用武力咁叫進步咗咩?

香港的確係經過幾十年順景而發展出一個文明社會,當中無可否香港係行過一場大運,但係有如此盛世嘅先決條件係香港曾經有良好管治,依幾十年嘅良好管治,香港人唔洗點爭取都有。

但係幾十年前香港又係咪咁呢?以前嘅香港係貪污成風,貧富懸殊,嚴重官商勾結,差人囂張跋扈,會隨意喺街上踢車夫屁股,60年代更出現大量公司與銀行倒閉,勞資糾紛不斷,民怨四起,原因都係因為政府無認真為民管治社會,法律無保障市民,最終引至67暴動,香港問題先開始根治。如果當年無暴動發生,市民同港英政府係咪真係會認真反思香港管治需要改變?定係市民仍然覺得逆來順受,權貴繼續壓榨市民係理所當然呢?

60年代中期前,香港就連遊行係都好少見,雖然民怨四起,但係市民會否爭取權益的確成疑。直至66年罕有地出現蘇守忠絕食事件,事件起因為天星小輪大輻加價,蘇守忠事件後來引發至66年天星小輪騷亂事件,可惜騷動後,港英政府仍然死撐民怨與管治無關,可謂67暴動前奏。

當然有人會話當時有文革風潮,共產黨煽動及資助先會發生67暴動,但係社會真正安寧又有邊個煽動到。

不過具往矣,97後主權轉換,原有良好管治不再,香港管治變得不知所謂,高壓管治之下再次令民怨四起,和平反抗不得要領,終於擦槍走火,有人拿起磚頭。我唔會形容依個係進步定退步,我覺得係有人幫香港做咗依個 dirty work。不過角色由真正亂殺人嘅左仔暴徒,換咗做一班放棄自己前途去守護香港嘅年青人。而做 dirty work 嘅人亦都自知難受歡迎。

有人會話今次唔同,依個政府係仆街,香港只會更壞,但係當年見過67暴動嘅人,又敢唔敢講暴動之後香港會變好呢?又有幾多人當年鬧過政府會硬來?

我諗起金融市場有句說話叫 “this time is different"。大意係話金融市場去到極端(暴跌/暴升),就會聽到有人講今次唔同嘅,因為乜乜乜,同上次唔同架,例如係金融海嘯嘅時候,有人就話「今次唔同架,連銀行都執,依家邊係到底,衰十年都唔掂喇」,不過 “this time is different" 就係用嚟警剔人聽到依句說話嘅時侯,市場已經去到極端而可能出現逆轉,歷史就係會再重演,正如金融海嘯都無真係衰十年。

當然金融周期循環未必一定可以應用係社會發展,但係金融歷史同社會歷史往往緊緊相連, 而我亦祝願香港一樣可以出現逆轉!

P.S. 我唔係話香港聽日就會變好,依家只係角力嘅新開始