自魚蛋事變後[1],明顯地成個傳統黃絲陣營再分咗兩派:支持勇武以及反對勇武。Facebook 作為一個而家主要嘅資訊交流平台,喺好容易睇得出呢個轉變,同佢哋嘅邏輯理據以及處身嘅原因。小弟好好彩facebook有齊晒咁多個立場(我估)嘅Friend (Facebook-wise),包括:現役警察,保守民主,頑固左翼,勇武本土,傳統黃絲,傳統藍絲,港豬同周公密友[2][3]。今次撰文其實都係想由facebook出發,同唔支持勇武/支持紳士風度同和平抗爭嘅咁多位認真分析吓點解你唔撐勇武都唔好屌勇武。

首先從對家角度分析吓。

傳統藍絲嘅facebook account有個特點,出親post係個人戶口都冇乜人like冇乜人理。唔係代表佢毒,係代表佢哋facebook嘅作用同我哋一般人嘅有啲唔同;佢哋已經唔需要人哋認同,換個角度講,姐係佢哋唔會再咁容易受其他人影響而改變自己立場。當然你可以繼續做紳士搏民意,但係呢度咁極端嘅時刻你真係要諗吓仲有無用。

對港豬嚟講,佢哋對一切社會上嘅嘢基本上都唔會再諗,就算去到屠場,只要把刀未拖落去佢都唔會驚(逗趣啲諗,其實佢哋勇敢過任何一個勇武派添)。佢哋嘅facebook就係充斥住去咗邊度買嘢嘅相呀、去咗船P呀,或者判定佢哋為可愛型嘅心理測驗,你也來試試玩。當你問佢哋對呢啲嘢嘅睇法,佢哋只會用最直接嘅思維答你哋:政府打壓小販?唔好囉;你哋掟磚?曳曳呀;政府趕走無牌小販?咁佢哋犯法吖嘛;咁你估下又有咩方法化解?劏佢囉!

對周氏嚟講,佢哋嘅facebook就係乜都無,得閒有一兩個可能係韓星嘅搵銀包歌share出嚟[4]。佢哋同人嘅聯繫係少之又少,或者應該話佢哋並唔會主動接觸社會時事。只要你唔係燒到佢哋啲泡菜仔,佢話知你炸咗警察總部呀(誇飾法舉例咋,無叫人做呀),所以亦都唔駛理佢哋點諗。

至於嘅警察呢一個群體,算係我想討論嘅其中一個重點,佢哋嘅facebook同一般藍絲無異,但係有更大嘅原因令佢哋成為最rigid嘅群體。一般前線警察都比較低,本身life chances已經唔多,警察又有宿舍又有津貼,外在條件係無可能退出,福利同人工對公司管理其中一個作用,係要確保佢哋對公司嘅忠誠。至於內在嚟講,本身facebook已經好自閉,加上唔知點解藍絲們係有無限個group去不停散播消息。而我都講過佢哋facebook interaction係極少,either feeder or being-fed,日漸增強佢哋嘅信念。而警察部嘅洗腦係你不能想像架!除咗朋輩影響,佢哋上司亦會懶晒戰友咁鬧吓滋事者、媒體,甚至係警局入面嘅poster(做過認人戲子見到),所以差館同北韓冇其實乜分別。所以無論點,佢自己唔肯,佢點都冇得救。

所以話,你做紳士,做比邊個睇?你知,我知,單眼佬都知:就係你自己。

Footnotes    (↵ returns to text)
  1. 呢個規模叫革命其實侮辱咗呢個term,當然如果你話係大家抗爭思維有所謂"革命式改變"[劣質中文注意],呢個我唔反對,但係就咁叫魚蛋革命係絕對達唔到呢個語境。
  2. 其實Unfriend真係好白痴,知己知彼百戰百勝呀。
  3. 保守民主泛指唔想見到任何越軌行為嘅支持民主人士,傳統黃絲泛指會有去雨傘,但係冇明顯歸邊於勇武/保守派,港豬係乜都唔知又唔想知嘅人,周氏係乜都唔理而且唔想理嘅人。
  4. https://youtu.be/ZZO_r7XhX4Q?t=1m50s Credit: YickLau