近幾年,香港人已經慣性去吉吉島、柒田、J神或者品味買餸,兩大超級市場數量已經減少,而街市逐漸唔係主流選擇。行去凍櫃,一盒盒嘅雞肉,基本上醃一醃就可以煎得,簡單方便。

我諗緊,其實有幾多人,已經唔記得咗,其實呢啲包裝精美嘅雞肉,係好多條生命,被強行餵飼後大規模屠殺,將血放淨,斬頭後再將屍體拔毛、抽出器官,宰割後將身體部位分類,急凍封好再推出販賣?

當然,係人知道,「雞肉當然係從雞來」,而活喺富庶嘅香港,食肉時已經唔會將屠宰過程關聯起嚟,但透過電視,甚至親眼目睹「劏雞」過程嘅時候,有部分人又會覺得唔人道,核突或者污糟。

雖然我會避免食中國進口嘅肉類,但我並唔係素食者,認知肉 = 動物屍體呢個事實,人類本身係雜食動物,要做嘅就係學識食物得來不易,感恩同唔好浪費,故此近十年來都只係去過兩三次自助餐,平時出街食唔晒會打包拎走。

然而,初一晚嘅魚蛋革命,發現咗原來好多人好鍾意食肉,但又唔鍾意見到屠宰過程 (it’s just a metaphor, OK?)。不過某程度上都係正常嘅,人有惻隱之心,70年代嘅越戰,某程度上都係因為不斷傳來血腥嘅畫面,而導致美國大規模反戰,最終美軍全面撤出越南 (又引發越共屠殺南越遺民則作後話)。

如果你係既得利益者,由始至終係反對任何運動,支持政府、支持警察執法,that’s fine,清朝命官冇理由支持革命黨嘅,不過歷史企喺我哋呢邊之嘛;

如果你係希望香港有更好民主制度、更透明同負責嘅政府,希望透過非暴力手段,例如任何形式嘅不合作運動,只要唔好抽人後腿,我都一樣支持;

之但係如果你又想要社會變好,唔做嘢不突止,人哋落場仲畀你鬧番轉頭甚至篤灰,咁你不如老實承認「要劏要殺你哋嗌,有著數就我攞晒」啦~

最後容許我賣下廣告:「CALL4VAN之友」係一個收集新服務意見嘅群組,希望各位加入,畀啲意見,令我哋做得更好: https://goo.gl/KtYpZX