赤口深圳個表姨媽又過黎,心諗今次死啦又要俾人問幾時先嫁得出,點知食完件糕呀媽就開口

「呀豪仔係工商銀行度做,幾好嗎?今年出幾多個月花紅呀?」

呀表姨媽即刻變晒樣

「鬼咩,仲花紅!成個部門放假呀!年三十放到正月廿八呀!」

「年假放得耐咪幾好囉」

「無工資架!」

我翻譯下,工資即係人工咁解,即係無薪假

我呀媽向來都覺得中共係全知全能阿爺,死都唔信

「唔係呀?工商銀行喎!四大銀行喎!仲要係前海自貿區喎!深圳經濟最好架,有乜可能呀!」

睇住呀表姨媽塊面越黎越燶,我心諗呀媽你係咪串佢

「呀仔話喎,D老闆而家無晒錢,借到盡,放貸部門每人每月要放兩千萬,點放啫?咪放假囉!過完年D老闆唔知會唔會走佬添!」

「咁呀豪仔會唔會轉工呀?」

「唔啦,到時D老闆破產,佢地會搵老婆孭數架啦!」

「係囉,始終大銀行,阿爺會放水架嘛,無問題嘅!」

大家飲茶,無事發生,又繼續聲討我嫁唔出

但我就諗起之前網上傳言天涯有人話過年前建行定農行幾個月出唔到糧,我呢D入唔到銀行做嘅廢青當然覺得恨唔黎啦

今年應該都好大風浪架啦,坐穩呀