離港離地數日,返香港俾人問起年初一旺角打大交單嘢,我又不在場問我做咩啫,不過條友死chur住我要講,唯有「盡訴心中情」啦。

「為咗串魚蛋打交?唔係掛?」

為咗串魚蛋?整理返成件事,我見到食環掃唔走小販,就叫差人嚟,點知差人嚟到唔係掃小販,係掃買魚蛋嘅人!我嚟買串魚蛋都俾你掃,咪初則口角繼而動武囉!小販冇因為咁而停業,仲賣到四點幾!真係只係為串魚蛋?

「咁小販係咪無牌熟食先?唔同由得佢哋周街擺?啲嘢唔衛生,走鬼又危險。」

全香港得旺角有小販咩?小西灣、黃大仙、屯門都有,點解淨係搞旺角同良景?小西灣同黃大仙嘅小販乾淨啲,走鬼上嚟有秩序啲?一直以嚟選擇性執法,導致市民不滿,先係今次事件嘅主因,小販只係爆發點。其實唔止選擇性執法,市民一直受到不公平對待,都係導致今次事件嘅原因。

「唔代表班暴民可以暴動喎!」

吓?咁就係暴動?67年放炸彈、燒車、死人,嗰啲叫咩?今次年初一晚打完,年初二店舖照常營業、夜晚放煙花,年初三又跑馬,真係暴動嘅話,你哋仲有咁爽?

「咁打警察呢?無論點都唔可以用暴力啦掛?」

係呀,我都唔想用暴力架!但如果你俾人打,你都會還拖掛?我都見電視上面有啲人追住警察打,但晌一班怒火中燒嘅人面前,有個著警察制服嘅人,就算佢只係警民關係科,都會成為目標,呢個係警隊嘅共業,亦係市民宣洩對公權力,即係政府嘅不滿。Well……或者你都可能叫差佬唔好吓吓用胡椒、警棍咁暴力嘅。

「咁叻,你唔好直接打入去政府總部,推翻政權?」

你打RPG都唔可能一嘢打大魔王啦!梗係打吓小怪、刷吓副本升lv,最好儲吓裝備,跟住先打boss架嘛!而家咪係升lv階段囉!話唔定日後真係可以打爆機架,不過當然會有game over嘅風險啦!」

「但係咁樣我好唔鍾意囉,而且咁樣佢哋會失去大眾支持。」

痴線!你話唔鍾意就唔會發生咩?今次只係開端咋,日後肯定陸續有嚟,而且越演越烈!以前差佬出椒我哋已經好驚,而家都習以為常啦!抗爭亦係一樣,慢慢升級。當然,如果日後社會狀況有變,抗爭可能會降溫,不過照而家個勢,都幾難囉!

至於你話支唔支持,我估真係抗爭嘅人應該冇諗咁多囉,反正香港最多所謂中立派,邊個贏就撐邊個架啦!

「除咗咁,真係冇其他方法?」

有咩其他方法?靜坐、遊行呢啲,搞咗咁多年,得個桔。非常時期用非常方法,正如一個人好人好姐,我話要鋸佢腳,係人都話我痴線,但如果係糖尿病加上傷口感染呢?咁截肢就係保命啦喎!

「嘩你唔好再極端啲!」

咁呀……好似生cancer咁囉,電療、化療、標靶藥、開刀,樣樣都辛苦、有副作用,但係咪唔醫,由得病人死?香港而家就係病人,你同我就係細胞,唔救香港,你同我都生存唔到。都冇旨意你去救、俾你坐享其成,你仲阿支阿咗?

「咁你即係話佢哋做得啱啦!」

我哋只係見證同記錄,評價啱唔啱係後人嘅事,孫中山先生都係通緝犯同四大寇之首,贏咗,咪成為國父囉!同樣今日呢班人係你口中嘅「暴民」,可能第日佢哋會成為革命先鋒架!

「超!你有晒立場偏幫住佢哋,咁冇嘢好講啦!」

大佬又係你話要講,講完唔啱聽又嬲嬲豬,駛唔駛ungoogoo呀?係人都應該有立場,以前都有教過呢個世界冇value free,除非你打算講冇內容嘅廢話,只係我講嘅唔係太啱你聽之嘛。

「費事同你講!」

好哋哋一個聚會,係要搞到不歡而散。

老人家話,新年流流整單咁嘅嘢提早開年,今年睇嚟都唔會順利得去邊,加上之後係雞、狗年,可能仲有兩三年雞犬不寧嘅日子,希望亂完之後會有轉機啦!