(本身依篇文就完成咗好鬼耐,多番投稿都冇媒體肯登,但係經過丙申元旦之戰一役,各大社交媒體都議論紛紛,部份人覺得今次丙申元旦之戰同暴動冇分別。個人認為依篇文好適合係依個時勢比其他人睇。所以將本文略作修改,再次投稿。)‬

機動戰士– 姐係俗稱既高達。可以話係動漫迷既必修科,由第一套高達至今,已經有成三十幾年既歷史。有唔少人比佢既既機械人所吸引,又有d係比佢既角色既外形所吸引。但係對我而言,高達最吸引人既地方係佢故事中唔同既價值觀同思想之間既角力,就好似寶少同馬沙佢地兩個咁。而依家我想講既係一個較為近期既作品-機動戰士00。

成個故事既大綱大概係咁:由於因為地球上的化石燃料枯竭,當時地球上既三個超大國家群興建咗三座軌道升降機,用以建構巨大的太陽能發電衞星,以解決能源既問題。但係因為三個超大國家群互相唔妥大家,所以不時會有紛爭出現。就係依個時候,一班以根絕戰爭為理念,名為「天人」既私人武裝組織出現,開始對世界宣戰。當係成個計劃進行到一半既時候,「天人」出現咗二五仔,將組織中既技術出買比各大國家群,結果佢地就係咁暫時性收咗皮。不過「天人」係四年後捲土重來。今次佢地除咗要根絕戰爭外,仲要打敗變革者以及「A-LAWS」,搶返VEDA(即係故事中既超級電腦)。經過一輪苦戰之後,「天人」佢地成功咗啦,仲令到世界對佢地改觀。再過多兩年,地球面對外星人既來襲,「天人」同地球聯合軍聯手對抗之。根據故事中既論述,機動戰士00既中心思想係「溝通」,只要有溝通,根本就唔需要有戰爭或者係戰鬥既存在。

但係到底係咪真係只要有對話就可以解決所有既問題?

係機動戰士00依個故仔入邊,的而且確地係不斷同觀眾講「溝通」既重要性,但係其實佢亦都冇否定過戰鬥既必要性。例如係故事既尾聲,地球聯合軍係以武力既手段對抗「A-LAWS」;「天人」係以武力既手段對抗變革者;剎那係以武力既手段對抗利保遜•阿路瑪古;洛奧係以武力既手段對抗亞里•艾露•撒祖斯。點解?因為利保遜•阿路瑪古,一個變革者既領導人,不斷又不斷地以狗眼看人低既態度來評估人類。佢覺得人類係能力上同思想上都無法同變革者依個種族相比,根本唔願意同人類作出坦誠既溝通;亞里•艾露•撒祖斯,佢生性好戰,只視戰爭係生財既工具。由於佢只樂於於戰爭中尋找快樂同金錢,所以佢又係唔願意同其他人溝通。再者,故事中既當權者,亦即係「A-LAWS」,佢地為咗保護自己既權勢,刻意扭曲情報,派出武力鎮壓百姓。係以上咁多款情況下,試問係咪真係可以單夠坦誠對話,就能夠交換彼此想法,從而令世界變成更和平呢?我既答案係「NO」。

係機動戰士00劇場版既尾段,渡金版既剎那同年老既瑪莉娜•伊斯梅爾見面既時候,佢地都互相認同對方促進和平既方式,即係「對話」同「戰鬥」。表明咗「對話」同「戰鬥」都係推動到去和平既辦法。因為對住一班根本由此至終都冇意慾同你互相了解既人,「對話」根本唔係一種好既方法,因為「對話」唔能夠對抗強權既欺壓,「對話」唔能夠保護自己既生命。唯有「戰鬥」先係唯一出路!

反觀香港,當你以「愛與和平」作為口號係冇問題,但係前題係要當權者或者在上位者係會聽市民既聲音。當班當權者係唔願意同市民坦誠溝通既時候,抗爭同戰鬥會係唯一出路。