嘔左兩日,尋晚仲屙緊晨早食藥訓。點知兩三點扎醒,碌下個Facebook。旺角開槍!?即刻開電視TVB新聞同時不斷擦即時新聞同newsfeed,跟左成晚最後都頂唔住再訓。今朝一起身已經收場,連我老母都睇完(幫佢利申佢pro-中共的)仲問個交警點會咁蠢開槍。之後先不得了,見到好多澳門朋友share一段「點解個警察會開槍」既片,再加埋「唔通真係等死咩?」既回應,實在需要寫返啲野。

事緣香港每年年初一二三喺某啲地方都會有無牌熟食小販擺賣,而平時香港食環雖然比較嚴,但新蒸頭通常都會由佢(新年流流無謂啦,同澳門啲炮仗情況差不多)。係呢幾年揸正嚟做但又唔開放小販牌逼啲人要入屋畀租,等如臺灣取消夜市一樣,梗有人唔制啦。咁本身小販以前有樣野叫「走鬼」,你食環嚟趕,我咪走囉,同澳門周街違迫一樣啫,都係搵嗰三日,唔駛搵命搏掛。

點知尋晚香港食環叫齊警察就係要圍起佢,唔畀你走又要拉,擺明新蒸頭唔畀你篤魚蛋仲要你臭格過新年,去到深夜仲出埋警棍同胡椒噴霧,頭都穿哂成地血喇,又冇得走自然就還拖架啦(fight or flight,遇襲人腦正常冇第三個選項,除非你係心理異常者)。還還下就有個交警攞槍出嚟「自衛」、「示警」喇,有冇諗返起當年澳門五一拎支槍出嚟最後大家年年有錢派嗰位先生呢?我不嬲尊敬警察(自少uncle有香港黃竹坑教頭,我自己有兩個老死係澳門治安部隊添)但鄙視「差人」(工作上你估下我見幾多差人為查案打犯?)。你做警察,咁樣攞支炮出嚟,人地只會更驚更激,之後既大家都有片,唔好淨係睇一邊,我都會睇tvb啦,咁先全面架嘛。

又有人講到「暴動就係唔啱」,咁就要講下歷史,有啲長。由2014年尾到而家,已經幾多單「被襲警案」?用胸襲警又有、「警察」畀假口供多到唔駛恨。有人打我我就報警啫,咁差人打人點算呢?原來有個監警會,朱警司話警棍係手臂既延伸亂打人仲有得食長糧、暗角七個差人打一個連TVB攝影師都唔敢作證嗰個監警會呀嘛?你叫人點相信仲有法治?小販你話可以修法,人地立法會唔好得澳門嗰個幾多咋。澳門而家衛生局起正個傳染病大樓你隔離完全合情合法合理架,一個唔該有人連環虐畜非禮係冇事架,到你反離補嗰日崔生厚起面皮過左佢,而和平理性非暴力既野香港經歷左廿年(臺灣更多),澳門先起步,到時就係澳門警方要維持治安架喇。我只希望佢地做返警察既本份,我上次遞封聯署去澳日要求正視精神障礙報導咋都四個司警傍住,你自己諗啦。

有啲野係要經歷過先會明,我唔會迫你信,但我一直相信警察有警察既義務同尊嚴,唔係點解佢有權陀住支炮?當警察自己都唔要呢份尊嚴淪為差人,而議會失效令到所有野都合法但唔合理(望下條高鐵同輕軌?納緊稅架。仲有銅鑼灣書店?你咪以為攞住葡國護照就唔係中國人),總會有唔死心既人企出嚟想爭取一啲改變。過程可能會有暴動有阻人搵食,但我地上一輩都喺五十年前行過呢條路(火燒白皮豬黃皮狗總聽過啦),冇人死真係不幸中萬幸。有時啲野未埋身人係唔會諗,我明,我真係明(唔係我讀psycho嚟托)。但我真係鼓勵大家睇多啲睇深啲。好多野都唔只係單一因素導致既,亦冇咁多咩鬼陰謀論既證據(外國勢力美帝亡我之心不死諸如此類),最好係喺現場睇。如果唔清楚咪出少句當幫忙囉,唔出聲冇人話你啞架,人唔駛無時無刻表態架。

我都鍾意去臺灣夜市、都鍾意動物(我家有兩隻貓,附近仲有流浪貓)、都唔想有一日touchwood抽水哥再開槍既時候,大家被打仲有人按like,你估警棍胡椒噴霧唔痛、畀人用槍指住唔驚咩?你又會唔會無程程走去為搞事博畀人用子彈嚇?最多都係陳勝吳廣咁咋。將心比心啦。祝新年進步。