一夜過後,又係打傳媒戰嘅時間,應該點定性依件事?

先睇D唔合理嘅。

政府同黑警將魚蛋革命定性為動亂、暴動,覺得小市民篤串魚蛋會影響法治,所以要果斷執法;有D人(唔單單係藍絲)覺得小販本身無牌經營,係犯法,所以支持警方執法;亦有意見認爲本民前係現場舉直幡有騎劫之嫌,係本土政棍為一己私利而推D市民去死嘅所作所爲,所以梁天琦俾人拉係搶光環。

咁樣嘅定性基本上只係搵交嗌,將一件食魚蛋食到流血收場嘅事件,懶中立咁話邊個犯法、邊個有得益,邊個就唔岩。另外,亦將焦點模糊化:將小販規範議題、選舉、689施政、甚至乎左右之爭,混為一談。

當然,有唔少人會講,食串魚蛋姐,洗乜搞到咁?小弟同庭妹開頭都有類似諗法,覺得黑警搞屎棍,阻住大家新年開開心心;特別自庭妹開始直播,到中左胡椒噴霧,睇直播嘅小弟一直都好擔心同無奈,不過擔心嘅都係安危,擔心所愛嘅人,甚至有D自責保護唔到佢,好似以前示威果D咁。然而,再諗深一層,件事應該更嚴重。

無錯,食串魚蛋搞到動棍動槍,的確好無謂(仲要搞到阿庭走左尾班車),不過未算係重點。問題係:家陣已經去到食魚蛋都比人打喇!香港人你不安嗎?你仲忍到嗎?

胡椒噴霧,大家習慣左;警棍,大家習慣左;就算比人告,要坐監,都有人習慣左。另一方面,遊行,大家知道左有黑警;普通行街,大家知道隨時會俾人話阻差辦工;甚至去到近期有人無端端消失左,大家都視若無睹。

你睇琴晚?普通行行下街,食下魚蛋過下節,無端端就出事,仲要開槍,而且係違法!大佬,家陣開槍喇!仲係度篤魚蛋?仲係度擔心D魚蛋乾淨唔乾淨?依家係人身安全問題吖!連自己日常生活都保證唔到平安無事啊!食串魚蛋都搞到好撚不安呀!

總而言之,魚蛋革命應定性為黑警無法無天(依個就一向架喇),香港人人身自由受到威脅,依家唔洗返上去,唔洗示威遊行,閒閒地係閙市度掃街人地就會向你開槍,名義上係維穩,實際上係打壓你,壓縮你生存空間、自由。

香港人,你仲要忍到幾時呢?