精神醫學日新月異,以前精神病可能只令人聯想起精神錯亂(Psychosis),慢慢情緒病(例如燥鬱症)都納入其中,大家又知唔知,原來衰格都可能係因為你有病?以下極簡單地介紹Diagnostic and Statistical Manual of Mental Disorders(DSM-5)入面被納入人格障礙( Personality disorders)嘅十類衰格方式,下次想鬧人時,唔好講:點解你阿媽生到你咁衰格?試下講:我認為你可能有人格障礙。


《小王子》插圖
Cluster A:同精神分裂(Schizophrenia)有關嘅人格障礙。佢地好似戴咗副特制眼鏡嘅,有一套獨特嘅世界觀,堅持用自己嘅方式解讀世界。例如人人都睇得出幅畫係畫梗一頂帽,佢地就死都要拗係一條蛇吞咗隻大笨象落肚。(不過幅畫畫梗乜又冇國際標準,又唔可以話佢地錯哂嘅。)另外,過於親密嘅關係會令佢地唔舒服,名副其實「碰到棉花也會受傷」。

1. Paranoid personality disorder偏執性人格障礙:覺得全世界都欠咗自己,人地做任何嘢都係迫害梗自己。(為免被指為種族歧視法西斯,讀者請自行聯想。)

2. Schizoid personality disorder分裂樣人格障礙:冇興趣同人建立連繫,冷感,冇乜情緒。

呢個描述令我即刻諗起《異鄉人》嘅主角。呢位主角對自己嘅老母同埋女朋友都冇乜感情,當佢因為意氣之爭謀殺他人後,法官考慮到佢對媽媽冷血無情嘅態度,認定佢有反社會人格,判咗佢死刑。呢種同周團都好疏離嘅人,明明生活係出生地,但始終同世界隔住浸嘢,終其一生都係心靈上嘅異鄉人。

玩過咎狗之血嘅腐女,會唔會諗起初期嘅Akira呢?話時話,日本ACG入面應該唔少呢啲冰山美人系嘅角色,例如進擊的巨人嘅阿妮,或者銀魂嘅信女,證明只要係靚女,咩性格都計係萌點。

3. Schizotypal personality disorder分裂型人格障礙:個名真係混亂到呢,睇中文都唔明,唯有參考日文啦。日本人直譯Schizoid分裂樣做片假名,但係Schizotypal分裂型就譯做「統合失調型」,即係精神分裂(Schizophrenia)嘅日文譯名。呢款都近精神分裂症,不過未去到病嘅程度,具體啲講就係行為奇特,古古怪怪,神神化化⋯⋯吖⋯⋯邊忽具體?

其實我都唔係好明係乜,當係精神分裂嘅輕微版啦。我地上堂時,醫生畫唔同嘅車代表各種人格障礙,而分裂型直接變咗㗎UFO。吖,呢啲係咪叫電波系?

4. Antisocial personality disorder反社會人格障礙:冇同理心,唔care人地感受,會做啲傷害他人權利嘅嘢。覺得自己好巴閉,會嘗試控制人。

5. Narcissistic personality disorder自戀性人格障礙:冇同理心,覺得自己好巴閉,好需要人地祟拜自己。

因為呢兩款好似,所以擺埋一齊講。當然,反社會比起自戀狂仲多咗控制他人同理傷害他人嘅特質,仲Worse!睇歷史書時見到總裁者,總會忍唔住懷疑佢地就算唔係反社會,都有啲自戀性人格障礙。比較貼身嘅例子梗係虎媽啦,張愛玲《金鎖記》入面嘅曹七巧,控制自己一對兒女嘅人生,用閑言閑語迫死新抱,都算好典型嘅反社會人格障礙啦。

百年孤寂中的第五代家長奧瑞里諾亞以為自己是主教,成天在空蕩蕩的昔日望族大宅中模託主教的步姿遊蕩,也是典型的自戀性人格障礙者了。

6. Borderline personality disorder邊緣性人格障礙:非常活躍(Active)嘅人,光譜入面企響距離隋性氣體最遠嘅位置。佢地自我形象唔穩定(一時自悲一時自大),情緒唔穩定,關係唔穩定(一時愛你愛到要死一時恨你一世),簡直好似氣球咁有(體積上嘅)彈性。性格衝動,傾向於自我傷害,人生空虛,成日驚自己被人遺棄。

點解我會諗起瓊瑤小說入面嘅女主角呢?搞到我都好想衝入去大風大雨中悲憤咆吼「我恨你更多!!!!」㖭。

好啦講近期啲,NANA電影版入面,奈奈同巧對質時,衝入廁所嘔吐,當時巧施施然地入去廁所,同奈奈講:「你睇下你,書又讀唔成,工作冇一份做得長,覺得唔開心就隨隨便便搵個男人上床。」巧嘅描述完全係一個邊緣性人格障礙嘅速寫。

擺落現實生活中,一生自殺N次,成日約情人自盡,最終成功殉情,仲寫埋篇名作來描述自己嘅心靈有幾咁空虛,咦?咁似⋯⋯唔開名啦。

話時話吖,現實生活中我唔敢講,不過文學作品入面呢種唔按牌理出牌嘅女人真係魅力十足。

7. Histrionic personality disorder戲劇性人格障礙:呢個夠哂直接,就係成日做啲attention seeking行為嘅人,情緒多到好似要做戲咁。一哭二鬧三上吊,就係講梗佢地。

8. Avoidant personality disorder迴避性人格障礙:玻璃心,好介意人地負面評語,覺得全世界都唔肯同自己玩。(為免被指為種族歧視法西斯,讀者請自行聯想。)

9. Dependent personality disorder依賴性人格障礙:心靈上未斷奶,好渴望人地湊自己,錫自己。當然,狗仔都正係因為呢種特質至咁得人錫,成為「人類最好嘅朋友」,不過一個人牛高馬大冇狗狗咁可愛仲要癡埋人地度,就相當恐怖啦。講到尾都係your face your fate,可愛即正義。唉。

10. Obsessive-compulsive personality disorder強迫性人格障礙:呢種都多見,就係做嘢死板,死守規距,極度希望控制到周圍嘅環境。感覺上好似老一輩口中嘅傳統好男人。不過,強迫症(obsessive-compulsive disorder)唔同強迫性人格障礙,強迫症中特定不斷湧現嘅念頭同重覆嘅行為會令患者痛苦(Egodystonic),強迫性人格障礙又未去到咁令人難受嘅地步。

以上就係九種人格障礙嘅簡介啦。唔知幾時,中二病都會納入人格障礙呢?