其實無論係我,定係其他網上好多作者,都講過無數無數次,要得到大家所講所追求嘅所謂「民主自由」,流血受傷死人係少不免。縱觀歷史,法國大革命、林肯解放黑奴、辛亥革命、布拉格之春,以至近代嘅南斯拉夫分列同克里米亞事變,有幾多人為咗所謂嘅「民主自由」,家園盡毁,犧牲咗幾多人命,流咗幾多血?

呢一晚嘅旺角,正好話俾沉睡嘅香港人聽乜野叫抗爭乜野叫革命。換個頭像嗌幾句「我要真普選」就有真普選就有民主,真係咪撚玩啦!幾檔小販賣吓魚旦,警渣就可以開槍可以打到個女人頭破血流。呢啲野係可以隨時發生喺你、我、我地嘅朋友、我地嘅屋企人身上。你女朋友可能有一晚夜咗番屋企,喺旺角咁就俾人打爆個頭﹔你個仔可能行行下街,咁就中咗警察啲子彈架喇……

呢一晚嘅旺角街頭,我地嘅群眾,我地嘅人民,真真正正咁,用自己嘅生命做賭注,去同暴政對抗。今晚嘅旺角街頭,有槍火,有磚頭,有血有淚,呢啲,先叫做抗爭,呢啲,先叫做革命。

我好肯定,呢一晚發生嘅事,香港人好快就會忘記哂,今晚仲有煙花放添 🙂 但我好希望香港人經過今晚真係可以長進過嚟,係,我係指成日講住「民主自由」嘅一班香港人。其實,要有「民主自由」,真係要犧牲,真係要做好多好多野架!今晚,就算有開槍,有掟磚,有放火,有流血,但係我其實係開心嘅,點解?除咗因為我係一個冷酷嘅法西斯之外,更加係因為今晚發生嘅事係一個最好嘅例證去話俾香港人聽,一場革命,應該點做。抗爭嘅人民點做,政權之下嘅爪牙會點做,今晚,睇到哂。雖然,今晚只係一個好開端好開端。

喺呢度要向所有喺街上流咗汗流咗血嘅香港公民講一聲多謝,自己以前上過街,好清楚街上面可以有幾危險。

我知道有人會話你地今晚做嘅野好無謂……

我知道有人會話你地係暴民……

但我想講,你地今次做到哂成個所謂「雨傘革命」冇人做到嘅野。

Sorry,我其實好想包裝到呢晚發生嘅事好易入口好啱香港人和平抗爭嘅口味,但真係好對唔住,我文筆太拙劣,真係做唔到。

因為,呢晚嘅事話俾大家聽,喺真正嘅抗爭真正嘅革命之中,警察真係會打柒你。而人民會反擊反抗,用盡一切手段,去爭取自已嘅未來。

到最尾,流咗咁多血,只有少數會成功。

好少好少數。

呢個先係民主自由血腥腥嘅一面。