曾經 pnd係全班、全級、甚至係全校都一齊玩既遊戲,Friend玩、同學玩、老師玩,連女仔都玩!今時今日手機遊戲大行其道,pnd都算係佼佼者、代表作。我無意話其他game唔好玩,但無可否認全盛時期既pnd的確無其他手機遊戲能匹敵,再唔係睇下神抄,淨係食佢條水都發到,你話啦係咪勁先?今時今日,手機遊戲百花齊放,出名既白貓、MS都未必及佢頭兩年一半咁多人玩。例外既係Ingress,呢個都已經唔算係遊戲啦所以我唔會攞佢同pnd比。當時PND火熱程度真係天下無雙,幾多阿Sir分享自己學生上堂借尿遁抽蛋打超金。

上星期偶然down番黎睇,發現d隊長全部都係陌生面孔,一隻隻一批批唔識既神,而我仲係開住隻撒旦,遊戲信息都已經係講緊六七百日前。新神愈出愈誇張愈高倍,今非昔比。當年一隻火埃起手已經係非同凡響,16倍已經係天文數字,當年過宙斯、暗大波,應該有唔少人同我一樣,用根石虹晶加幾石先磨到,反之今時今日簡直係轆過。路西法甫出現,幾多人用幾多石抽呢隻做磨隊隊長,配月光龍等暗寵,帶領玩家衝破一個個關卡。木埃當年三倍都頗受歡迎,令木系9倍隊大行其道。

最後又點少得光埃打撒旦,當時我屬校中少數有光埃的中獎人仕,借重貨同學隻297光埃,衝向撒旦大魔王,全級同學於課室一同圍觀,你一言我一語熱烈討論著,猶如置身街市。仲請轉珠達人替我動手,起手時,全場屏息以待,幾十雙眼睛注視在不足四吋的螢幕上,居然靜得聽到外頭的腳步聲,場面歷歷在目。我諗今時今日無乜一隻手機遊戲做到。

去廁所抽蛋、上堂喺櫃桶轉珠、叫朋友上堂開第隻隊長比你,相信唔少朋友都有呢啲共同回憶。時光飛逝,你已步進社會,展開人生新一頁,遊戲亦慢慢沒落,你同中學同學、朋友既感情又係咪一樣變淡呢?遊戲唔啱玩唔好玩,玩過第隻囉,但同學、朋友唔多,如果你都有諗起你班同你分開左既同學同PND buddy,就算你冇再玩,大家問好下關心下大家都得掛?行出第一步,就用PND做話題啦。

有啲野過左就係過左,留唔住亦變唔返好似以前咁。遊戲係,上一秒係,但友情感情未必係,如果你仲掛住同你一齊PND班朋友,主動搵下佢地啦。

「喂,仲有冇玩pnd啊?啲神勁左好多喎……」