話說見到有位朋友因為專頁少人LIKE,就心灰意冷索性關閉專頁,佢認為寫長文無人理,寫短文反而多人LIKE,搞到自己好無癮。

咁啱早兩日重溫黃洋達個節目笑死朕,有一集都講起依個問題。裡面講到,以前做作家寫小說出書,最低要求7萬字;以前攝影師或導演拍短片只係當練習,目標都係拍長片,但隨著社會轉變,不論係FB、YOUTUBE依類平台既出現,加上人類社會節奏越來越急促,都徹底改變都市人閱讀同埋接觸娛樂嘅習慣,傾向以最短時間閱讀最多最精簡嘅文章,會習慣睇幾分鐘內要幾個高潮既短片,稍為要花長少少時間閱讀同埋觀賞嘅文同片大眾可能都無心機睇。不過,黃洋達係節目裡面都有講到,咁樣唔代表長篇小說、長文、長片唔再有價值,只要做好內容,花心思就一樣會成功,應該如此相信。

我舉幾個例子,好似陳雲、陶傑、李怡、鄭立、盧斯達…(不能盡錄)等等,佢地嘅長文都有一種魅力,令讀者由頭讀到尾,文筆、觀點、分析各有千秋。

當然,有一點一定要講,就係作者本身嘅知名度。專注小眾題材,又或新手作者面對嘅困難,就係無名氣,所以好多時寫長文都直接沉低。除左名氣,仲有嘅困難就係「起標題」,而家網媒又好,素人又好,都傾向做「標題黨」,取一個好爆好爭議嘅標題,內容可能完全唔重要,就已經成功呃到幾百幾千LIKE;相反,題材比較偏門又或認真嘅文章,長篇大論建立一個論述嘅文章,讀者一見標題同題材唔吸引唔夠爆,內文幾百字或上千字就已經唔睇,最終只得個位至十位數LIKE,十位數至百位數點擊,自然就會好容易灰心。

以我經驗,我見過唔少羅列數據或史料,分析獨到,我自己睇完拍案叫絕嘅長文章,最終只有十位數LIKE,百位數點擊同閱讀;相反,一啲「標題黨」就好成功咁,靠誇張標題,鳩流立論同內容,呃到百幾LIKE,千幾閱讀數,情況係現實到令人無奈。

我雖然只係一個廢青,但我都想勸一下,各位有心寫作既朋友,如果唔係志在搵錢而係為左興趣同正義發聲,就唔好灰心唔好放棄,否則就真係劣幣遂良幣,個社會只會更不堪。心態要調整一下,讚好唔應該以量取勝,而係以質為重,你寫長文拍長片,如果有讀者肯由頭睇到尾最後讚好你,其實你比「標題黨」成功好多,唔好因讚好既多寡而令自己唔好心,尤其你係為興趣而唔係為別人。一拳超人有一句對白:「我係興趣使然而做英雄,而唔係為左別人認可。」其實創作都係,除非你目的只係為上位出書做商業作家。

我只係蝦毛,可能無資格講以上依番說話,但我真係唔想見到好寫手因為少人LIKE就封筆唔再寫,我仲想再讀各位嘅文章,我見到一定會分享同LIKE。

特別推薦而幾位寫手
何人可文章:http://polymerhk.com/articles/author/hoyanho/
Yukikm文章:http://polymerhk.com/articles/author/yukikm/
清君文章:http://polymerhk.com/articles/author/%E6%B8%85%E5%90%9B-%E5%90%9B/
思徒文章:http://polymerhk.com/articles/author/re/
易水寒文章:http://polymerhk.com/articles/author/cannykonstantine/
安德烈文章:http://polymerhk.com/articles/author/andrew/
羅惹文章:http://polymerhk.com/articles/author/lawya999/

好寫手…不能盡錄