話說庭妹同一個不知名新政黨主席一齊上左港台節目《視點31》講銅鑼灣書店同周子瑜事件。小弟未睇曬成集,但從精華所見,琴日有幾點係幾值得討論:

1. 從銅鑼灣書店睇一國兩制

呢單野首要問題唔係一國兩制,係最基本嘅人身安全,雖然呢樣係一國兩制賦予香港人嘅特權同老共政權嘅分別,不過「理論上」被消失係中國社會,任何國家都唔應該發生(拿…理論上)。然後先到兩制區隔。單野有冇影響一國兩制?絕對有,但唔係呢一件事咁簡單。自雨革之後,老共有意收緊香港自由同加快統戰係公開嘅秘密,係在乎軟性定梗硬黎,光明正大咁做定做得肉肉酸酸。而呢次明顯係做得太肉酸,變左死局。習近平情史對政權有威脅?可能,但非主因,亦唔見得老習會因為件事而自己一手破壞大國形象,對佢(地)黎講,由香港人自己一手破壞一國兩制,再2047大限順理成章收返,會係個大戰略,不過可能有變。

題外話,單野另外一個有趣嘅點,係當中國網民主流意見都係認為件事假到無倫(甚至有少少同情香港人)嘅同時,香港主流意見居然唔係不理不睬,就係覺得果五個人自己攞黎。可見,件事反而係有人賣菊花出賣自己,多過老共自己粗暴破壞一國兩制。

2. 從子瑜事件睇同一中各表

同香港單野有少少唔同,要分開講。台灣問題講左好多年,由光復台灣到和平統一,然後老美支持一個中國原則、李登輝台灣自主思想萌芽,到依家個局面,係歷史發展使然。如其話老共破壞一中各表,倒不如講價值觀差異。琴日同一個中國人跟一個台灣(台南)人傾計,有趣嘅係個中國人係贊成台獨,但條件係個名係「Chinese Republic of Taiwan」。雖然佢唔能夠代表全部中國人,但有一點肯定係,中國個「中」對中國人好重要,而呢個亦係目前嘅爭議點,因為唔係人人認同。撇除網上班憤青,你不難發覺大部分人對台灣同香港睇法唔同,覺得台灣唔再係under中國,獨立就由佢啦,問題係個「中」字:一方面要台灣承認自己係「華夏」子民,但一方面亦要台灣放棄「中國」繼承正統;所以長遠會係「一中一台」instead of「一中各表」/「兩個中國」。老共係咪破壞一中各表?who cares?大家都知道係美麗嘅大話。台灣變台灣省固然好,但目前首要維持良好貿易關係,畢竟地理上係老共對向西太平洋嘅屏障。

3. 中國誤解香港同台灣?

非也。反之,老共知道香港同台灣想要咩,但同時佢亦有自己嘅interest同agenda,佢唔急亦無謂粗暴破壞自己形象(即揠苗助長也),而可幸兩地均有本地人賣屎忽,老共當然樂於接受。都係果句,真正破壞主權係D內鬼,老共係順勢而行。

4. 公開資料同梁振英出面有助解決銅鑼灣書店事件困局?

前者策略上唔通,因為背後實在太黑暗;後者即係搵個連香港人自己都唔信嘅人出面(正如庭妹所言),無謂。「順理成章」,先有豬隊友出面,然後以香港人心態令事件不了了之(例如爆一D其他人嘅黑材料),老共達到目的後平安嘅人會平安歸來,再繼續粉飾太平,但大前提係老共唔再有關公災難。港豬可放心,李波事件唔影響老共係你身上嘅大戰略。

結論

兩件事皆不影響老共對港台主要政策,老共唔急於侵略港台兩地,不過若民間有輿論、有人進貢黑材料當然樂於接受,依家反而個重點係睇港台有幾多人會賣屎忽為老共行個方便然後出賣自己嘅主權、自己嘅自由。如其希望國際關注,倒不如守住自己個尾門唔好俾人爆菊,皆因國際社會多是愛莫能助,加上老共在國際間影響也大。