大家好,涯係安德烈,香港人,涯希望各位客家鄉親,為了台灣毋變成下一個香港,請你等無論如何,毋投給藍營:國民黨、親民黨、新黨這兜投共派,毋奉送台灣給這兜中國人。

涯等香港人在中國人、共產黨統治之下恁悽慘,就知道同共產黨講統一係無好下場。中國貪而無信,話給涯等普選行政長官,結果要由佢个提名委員會去提名給涯等選,所以涯等在2014年發動雨傘革命。中國人新移民湧入香港,搶涯等福利、醫院床位、學校學額;好多小學、中學又像係親民黨該兜宋楚瑜當年禁學老話、客家話,現下毋用廣東話去教中文課,要用普通話,推動文化侵略。當多傳媒講話支持中國大一統。現下中國越境綁架涯等个一個香港人李波去中國,只係因為佢出版書罵共產黨。中國就係共產黨,共產黨就係中國,現下係文化之爭,毋係純政治之爭。

在香港以前當多人,包含客家人,支持國民黨,好憎共產黨。但係國民黨如何對待佢等?國民黨人居住个調景嶺村被拆,國民黨毋理會。台灣去簽服貿,馬英九同習近平握手,國民黨毋兌現反攻大陸个承諾,毋在中國推行三民主義个理想,國民黨為了同中國做生理而背叛了人民。親民黨同新黨這兜人,同國民黨沆瀸一氣,一樣係自認中國人,欺眇台灣。同中國做生理个利益都係給大財團,台灣本地年青人个工資毋會漲,工作毋會多,工作都跑到中國。現下香港有當多中國大陸學生來搶大學學位,中國商人已經控制涯等个出版業,自由行來香港搶水貨,來到香港街上拉屎拉尿。票投國民黨,台灣變香港。涯等香港人佇毋著現下自由退步,連講句「香港獨立」都被人咒孤罵絕,毋民主政制,毋主權,被中國欺眇,你等都見到。

你等為了自家未來,為了自家可以繼續講客家話,無論如何,毋投給國民黨、親民黨、新黨這兜親中國投共派。感謝。

安德烈
2016年1月15日