香港一直比TVB霸住個娛樂,香港人已經好耐冇娛樂,想話笑下輕鬆下都唔得。
OK,咪唔睇TVB囉!FINE!唔做港豬。

我知而家香港打緊仗,我知全民退保,網絡23條就過,高鐵一地兩檢,李波又被公安捉左,林鄭仲踩住兩隻假海豚。
喂!而家無話唔理政治喎!咁係咪係香港獨立之前都唔比笑唔比開心先?點解睇100毛搞個分獎典禮都會受到本土派既攻擊?
而家玩緊木頭公仔?「木頭公仔唔准郁、唔准笑」?

難得有個台,認真制作,直頭去伊館開埋show。
咁個SHOW好睇,香港人笑下都唔得?
搞政治搞到傻左咩?

「100毛抄抄子黎既!幫俞琤洗底!何韻詩黃絲文化監暴喎!低級趣味!ONX當有趣!」
點啊!香港係咪以後都唔可以有娛樂架啦?
我想搵D娛樂開心下姐,你理得我高級定低級姐?
各位本土派大哥,真心請你地高抬貴手,放香港人一馬啦!
比我地開心一日咁多啊!
你地識得罵劉慧卿四方X,你地自己又唔諗下自己係咪同樣「乜X都唔啱」?
何必憎人開心厭人愁呢?我睇唔到欣賞個SHOW點樣破壞香港抗爭喎?
睇TVB就港豬,睇100毛就黃絲左膠!總之唔係每分每秒睇你精闢既政評就要批鬥?
你唔鐘意睇,咪唔好睇囉!做咩要逼全香港人陪你苦口苦臉?

各位網絡本土派勇士,我知各位英雄好漢要征戰四方。
但我真心覺得個SHOW好睇,開心一晚姐。打仗有時都要犒賞三軍啦!

唔知大家仲記唔記得,2013年既時候,黃鴨到港。
「本土派既敵人」左膠鄧小樺當年留下一句:「廉價快樂」。
個時個個都識罵佢,今日點解唔用番同一個標準去量度自己?
你既抗爭就高尚,人地既快樂就低俗廉價?
你曲高和寡係你既事,唔好阻住我「低俗廉價」既快樂好嗎?

引用墳總一句話:「不抗爭的人,看甚麼都不會抗爭。」
抗爭既人,亦唔係睇完個SHOW笑完之後變左左膠,港豬。
SO,HEY!RELAX,MAN~